ԵՐԵՎԱՆ, 11 հունվարի – Sputnik. Դատախազների պակաս կա, ուստի առաջարկվում է պահանջվող մասնագիտական առնվազն 3 տարվա ստաժը նվազեցնել ու դարձնել առնվազն 2 տարի։ ՀՀ ԱԺ պետական-իրավական հարցերի մշտական հանձնաժողովի հերթական նիստում օրենքի հեղինակ, ԱԺ «Քաղաքացիական պայմանագիր» խմբակցության պատգամավոր Արփի Դավոյանի խոսքով՝ 2 տարին բավական է անհրաժեշտ գործնական, մասնագիտական հմտությունների ձեռքբերման և անձնային որակների ձևավորման համար։
Պատգամավորի կարծիքով՝ դատախազության համակարգում իրականացվող բարեփոխումներն ու դատախազներին տրամադրվող դրամական միջոցների ավելացումներն արդեն իսկ նպաստել են, որ ավելանա դատախազ դառնալու ցանկություն ունեցողների թիվը։ Կարծում է՝ նախագիծն էլ կնպաստի, որ դեպի դատախազություն մասնագետների հոսքն ավելանա։
«Հայաստան» խմբակցության քարտուղար Արծվիկ Մինասյանի կարծիքով՝ առաջարկվող նախագիծը ոչ թե կադրային քաղաքականության համար է, այլ յուրայիններին տեղավորելու։
«Տպավորություն է, որ մեր յուրայինների ցուցակն ունեք։ Յուրայինների մասին խոսել այս օրենքի շրջանակներում որևէ կերպ ընդունելի չէ։ Փորձում ենք կոնկրետ խնդիր լուծել»,- արձագանքեց Արփի Դավոյանը։
Հանձնաժողովը ձայների մեծամասնությամբ դրական եզրակացություն տվեց նախագծին և կառաջարկի ԱԺ խորհրդին հարցն ընդգրկել ԱԺ առաջիկա լիագումար նիստերի օրակարգում։
Նշենք, որ «Դատախազության մասին» ՀՀ օրենքում կատարված փոփոխություններով արդեն իսկ դյուրացվել էին դատախազ դառնալու պահանջները։ Մասնավորապես, պահանջվող նվազագույն տարիքային շեմը դարձել էր 22 տարեկանը, ինչը հասարակական մի շարք կազմակերպություններ խնդրահարույց էին համարել և առաջարկել տարիքային շեմը բարձրացնել ու դարձնել առնվազն 25 տարեկան՝ հաշվի առնելով թեկնածուների ինչպես մարդկային կարողությունների, այնպես էլ մասնագիտական կարողությունների ու հմտությունների ձևավորման անհրաժեշտությունը։