ԵՐԵՎԱՆ, 9 հունվարի – Sputnik․ ՌԴ ԱԳՆ առաջատար խմբի ղեկավար ՍԵրգեյ Չաշչիխինը Կապանի համայնքապետ Գևորգ Փարսյանի հետ քննարկել է Կապանում Ռուսաստանի գլխավոր հյուպատոսության բացման հարցը։ Տեղեկությունը հայտնում է ՀՀ-ում ՌԴ դեսպանության մամուլի ծառայությունը։
Սերգեյ Չաշչիխինը շնորհակալություն է հայտնել քաղաքի ղեկավարությանը՝ ՌԴ գլխավոր հյուպատոսություն հիմնելու ուղղությամբ տարվող աշխատանքների շրջանակում գործնական աջակցության համար: Ռուս դիվանագետը նաև կարևորել է Կապանի ստեղծագործական և գործարար շրջանակների ներկայացուցիչների և առաջատար խմբի միջև շփումներն ընդլայնելու ուղղությամբ աշխատանքները։
«Մանրամասն քննարկվել են մշակութային-հումանիտար և առևտրատնտեսական ոլորտներում համագործակցության հեռանկարային ուղղությունները»,- նշված է հաղորդագրության մեջ։
Ընդգծվել է ռուսական քաղաքների հետ բարեկամական կապերի հաստատման և զարգացման կարևորությունը։
Հանդիպմանը մասնակցել է «Русский дом»-ի՝ Սյունիքի մարզում նախագծերի համադրող Լյուդմիլա Աղախանյանը։
Նշենք, որ 2023 թվականի նոյեմբերին Sputnik Արմենիայի հետ զրույցում Ռուսաստանի ԱԳՆ առաջատար խմբի ղեկավար Անդրեյ Շանինը հայտնել էր, որ Կապան քաղաքում ՌԴ գլխավոր հյուպատոսությունը կարող է սկսել գործել 2024 թվականի սկզբին։
Ավելի վաղ Ռուսաստանի կառավարության նախագահ Միխայիլ Միշուստինը Կապանում ՌԴ գլխավոր հյուպատոսության հիմնման մասին կարգադրություն էր ստորագրել։