ԵՐԵՎԱՆ, 8 հունվարի – Sputnik. ՀՀ արտաքին գործերի նախարար Արարատ Միրզոյանը տարածաշրջանային անվտանգությանը վերաբերող հարցեր է քննարկել ԱՄՆ պետքարտուղարի Կովկասյան բանակցությունների հարցերով ավագ խորհրդական, ԵԱՀԿ Մինսկի խմբի համանախագահ Լուիս Բոնոյի հետ։ Տեղեկությունը հայտնում է ՀՀ արտգործնախարարությունը` նշելով, որ Միրզոյանը Բոնոյին ընդունել է այսօր։
«Անդրադարձ է կատարվել Հայաստանի և Ադրբեջանի միջև հարաբերությունների կարգավորման գործընթացին»,– ասված է հաղորդագրությունում։
Հիշեցնենք, որ ԵԱՀԿ Մինսկի խմբի ամերիկացի համանախագահին այսօր ընդունել է նաև ՀՀ անվտանգության խորհրդի քարտուղար Արմեն Գրիգորյանը։ Նրանք նույնպես քննարկել են հայ–ադրբեջանական հարաբերությունների կարգավորման գործընթացին առնչվող հարցեր։ Հանդիպման ընթացքում ԱԽ քարտուղարը վերահաստատել է հայկական կողմի հանձնառությունը տարածաշրջանում հաստատելու երկարատև և համապարփակ խաղաղություն:
Նշենք, որ նախորդ անգամ Լուիս Բոնոն Հայաստան էր ժամանել 2023 թվականի նոյեմբերի 8-ին։