ՀՀ վարչապետ Նիկոլ Փաշինյանը Սուրբ ծննդյան ճրագալույցին հերթական անգամ սաղմոսով ուղերձ հղեց հայ ժողովրդին։ Այս անգամ նա ընթերցում է 20-րդ սաղմոսը։
«Թագավորը հույսը դնում է Տիրոջ վրա, այսուհետև` սաղմոս Դավթի։ Տե՛ր, զորությամբ քո պետք է ուրախանա թագավորը և հույս ցնծա քո փրկությամբ։ Նրա սրտի ուզածը տվիր նրան և նրա շրթունքների ցանկությունը չմերժեցիր։ Քո քաղցր օրհնությամբ այցելեցիր նրան և թանկագին քարերով ընդելուզված պսակ դրեցիր նրա գլխին։ Կյանք խնդրեց քեզնից և նրան երկար օրեր տվեցիր հավիտյանս հավիտենից։ Մեծ է նրա փառքը քեզնից եղած փրկությամբ, փառք ու պարծանք կդնես նրա վրա, օրհնության մեջ կհաստատես նրան հավիտյանս հավիտենից, կուրախացնես նրան քո երեսի խնդությամբ։ Թագավորը իր հույսը դրեց Տիրոջ վրա և բարձրյալի ողորմությամբ նա չի սասանվում։ Թող ձեռքդ անպակաս լինի քո թշնամիների վրա և աջդ հասնի բոլոր քեզ ատողներին։ Երբ դու երևաս, նրանց հրաբորբոք հնոց կդարձնես, Տերն իր զայրույթով կխռովի նրանց, և հուրը նրանց կլափի, երկրից կկորչի պտուղը նրանց, իսկ մարդկանց որդիներից` սերունդը նրանց։ Չարամտությամբ խոտորվեցին քեզնից, դավեր նյութեցին, բայց չեն կարող իրագործել դրանք։ Դու նրանց հալածական կանես, նրանց երեսը կուղղես քո հավատարիմների կողմը։ Բարձր եղի՛ր, Տեր, քո զորությամբ։ Օրհնենք և սաղմոս երգենք քո զորությանը»,–ասաց Փաշինյանը։
Նա սաղմոսն ավարտեց Սուրբ ծննդյան տոնին ընդունված ողջույնի խոսքով` «Քրիստոս ծնավ և հայտնեցավ, մեզ և ձեզ մեծ ավետիս»։
Հիշեցնենք, որ նա արդեն 3-րդ տարին անընդմեջ սաղմոսներ է կարդում Սուրբ ծննդի և Սուրբ Զատիկի առիթով։