ԵՐԵՎԱՆ, 5 հունվարի – Sputnik. Հարկման նպատակով ապացուցելը, որ սոցիալական ցանցերում գումարով գովազդ անող բլոգերներն իրենց ամեն հրապարակման համար գումար են վերցրնում, պատկան մարմինների համար շատ դժվար գործ է լինելու։ Այս մասին Sputnik Արեմնիայի հետ զրույցում ասաց բլոգեր Կամո Թովմասյանը` անդրադառնալով ՀՀ պետական եկամուտների կոմիտեի նախագահ Ռուստամ Բադասյանի հայտարարությանը, թե հարկային դաշտից խուսափող բլոգերների նկատմամբ կարող է վարչարարություն կիրառվել։
«Ես իմ ընկերությունը գրանցել եմ 2014 թ–ից և այդ ժամանակվանից հարկվում եմ, բայց, օրինակ, ես ամեն ինստագրամյան սթորիի համար, ամեն ֆեյսբուքյան հրապարակման համար գումար չեմ վերցնում։ Գուցե իմ ընկերը, օրինակ, ինչ որ ռեստորան է բացում, ես էլ ուզում եմ նրան նվեր անել ու անվճար լուսաբանել, դա բնական է։ Դա տեխնիկական հարց է, ու պետք է դա ապացուցել»,– նշեց բլոգերը։
Մեդիափորձագետ Սամվել Մարտիրոսյանը համակարծիք է, որ վերահսկողության մեխանիզմները կյանքի կոչելը դժվար է լինելու, բայց որ դա արդարացի որոշում է` խոսք չկա։
«Դա կոմերցիոն գործունեություն է ու կապ չունի` մարդ տաքսի է քշում, թե գովազդ է տեղադրում իր սոցիալական ցանցի էջում։ Ոչ մի տարբերություն, մեծ հաշվով, չկա»,– ասաց նա։
Հիշեցնենք, որ հունվարի 4–ին ՊԵԿ նախագահը հայտարարել էր, որ սոցհարթակներում գովազդ անողները չեն կարող ազատ լինել, և որ ցանկացած եկամուտ ենթակա է հարկման։
Նա հիշեցրել է, որ 2023-ին բազմաթիվ դեպքեր են գրանցվել երբ մարդիկ իրենց սոցիալական ցանցի էջում գովազդներ են տեղադրել և չեն հարկվել, նաև դեպքեր են եղել, որ առցանց իրեր են վաճառել, բայց հարկային դաշտից դուրս են մնացել։