ԵՐԵՎԱՆ, 4 հունվարի – Sputnik. Ռուսաստանի նախագահ Վլադիմիր Պուտինը հրամանագիր է ստորագրել ԶՈւ–ում պայմանագրային ծառայության անցած օտարերկրացիներին ՌԴ քաղաքացիություն տրամադրելու մասին։ Փաստաթուղթը հրապարակվել է իրավական տեղակատվության պաշտոնական կայքում։
«ՌԴ քաղաքացիություն ստանալու համար դիմումով կարող են դիմել օտարերկրյա այն քաղաքացիները, որոնք ռազմական հատուկ գործողությունների անցկացման ժամանակահատվածում պայմանագիր են կնքել ՌԴ ԶՈւ–ում կամ զորամիավորումներում զինվորական ծառայության անցնելու վերաբերյալ», – ասվում է հրամանագրում։
Ռուսական անձնագիր կկարողանան ստանալ նաև այն օտարերկրացիները, որոնք ռազմական հատուկ գործողությունների ժամանակ զինվորական ծառայության են անցել ԶՈւ–ում կամ զորացրվել այդ ժամանակահատվածում։
Նույն իրավունքն ունեն նաև օտարերկրյա քաղաքացիությամբ զինվորականների ընտանիքի անդամները։
Հիշեցնենք` 2022 թ–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։