ԵՐԵՎԱՆ, 4 հունվարի – Sputnik. Երևանի քաղաքապետարանի ենթակայությամբ գործող 162 մսուր-մանկապարտեզներից ընդամենը 41-ում տեղադրված են տեսագրող սարքեր: Տեղեկությունը հայտնում է Երևանի քաղաքապետարանը` պատասխանելով Sputnik Արմենիայի գրավոր հարցմանը։
Նշենք, որ վերջին ժամանակահատվածում համացանցում հաճախակի են դարձել այնպիսի տեսանյութերը, որոնցում երևում է, թե մանկապարտեզներում ինչպես են վերաբերվում երեխաներին։ Դրանք հիմնականում պարունակում են բռնության կադրեր։ Որոշ դեպքերով հարուցվել են քրեական գործեր։
Երևանի քաղաքապետարանից հայտնում են, որ տեսագրվող սարքերը տեղադրված են ընդհանուր օգտագործման տարածքներում՝ մուտքերի մոտ, միջանցքներում, նախասրահներում և այլն՝ հիմք ընդունելով ՀՀ արդարադատության նախարարության անձնական տվյալների պաշտպանության գործակալության՝ երեխաների անձնական տվյալների պաշտպանության մասին ուղեցույցը։
«Երևանի քաղաքապետարանում ներկայում ընթանում են համակողմանի քննարկումներ՝ բոլոր մանկապարտեզներում տեսագրող սարքերի տեղադրման անհրաժեշտության և առկա հնարավորությունների վերաբերյալ»,–հայտնում են քաղաքապետարանից:
Ընդգծվում է, որ տեսագրությունները կարող են հասանելի լինել այն անձանց, որոնք պատասխանատու են հաստատության անվտանգության ապահովման համար: Ծնողին տեսագրությունները հասանելի են դառնում իրավական գործընթացի շրջանակում՝ սահմանված կարգով: