ԵՐԵՎԱՆ, 3 հունվարի – Sputnik. «Ուժը Հայրենյաց» կուսակցության նախագահ Տիգրան Արզաքանցյանը պարզաբանել է, թե ինչու էին իրեն «Զվարթնոց» օդանավակայանից բերման ենթարկել, ձերբակալել, ապա բաց թողել։ Այս մասին նա գրել է «Ֆեյսբուքի» իր էջում։
«Շատերին դեռ մտահոգում է «Զվարթնոց» օդանավակայանում տեղի ունեցած միջադեպը։ Ես ճամփորդության էի մեկնում և ինձ հետ վերցրել էի օրինական ճանապարհով ձեռք բերված զենք, բայց ուղեբեռի հետ շփոթմունք էր եղել, որի պատճառով համապատասխան փաստաթղթերը կարողացա տրամադրել երեք ժամ ուշացումով»,– գրել է քաղաքական գործիչը։
Նա ընդգծել է, որ այժմ ամեն ինչ կարգին է, ընտանիքի հետ ԱՄԷ-ում է։ Արզաքանցյանը շեշտել է` իրավական հարցերն ամբողջությամբ լուծվել են։
Հիշեցնենք, որ 2023 թվականի դեկտեմբեի 29-ին Արզաքանցյանը պատրաստվում էր Երևանից Դուբայ մեկնել, սակայն նրան «Զվարթնոց» օդանավակայանից բերման էին ենթարկել։ Նրա ձեռքի պայուսակում անհայտ տիպի հրազենի 16 փամփուշտ էր հայտնաբերվել։ Քաղաքական գործչին ձերբակալել, հետո ազատ էին արձակել։ Քրեական վարույթ էր նախաձեռնվել 335-րդ հոդվածի հատկանիշներով, սակայն քրեական հետապնդում չէր հարուցվել։