ԵՐԵՎԱՆ, 3 հունվարի – Sputnik. Իրանի Քերման քաղաքում` գեներալ Քասեմ Սոլեյմանիի մահվան տարելիցի կապակցությամբ սգո երթի ժամանակ կատարված ահաբեկչությունը պատվիրած և իրականացրած անձինք կհայտնաբերվեն և օրենքի ողջ խստությամբ կպատժվեն։ Այս մասին հայտարարել է երկրի նախագահ Էբրահիմ Ռայիսին։
Նա դատապարտել է «հակաիրանական հանցագործների» ահաբեկչական այս քայլը և ցավակցել է զոհվածների ընտանիքներին։ Նա տեղի իշխանություններին կոչ է արել բոլոր տուժածներին օգնություն տրամադրելու համար միջոցները ձեռնարկել։
Իրանում հունվարի 4-ը սգո օր է հայտարարվել։
Հիշեցնենք՝ պայթյունների զոհերի թիվը, վերջին տվյալներով, 103 է։ Վիրավորվել է մոտ 200 մարդ։
Ավելի վաղ տեղեկացրել էինք, որ Իրանի Քերման քաղաքում` գեներալ Ղասեմ Սոլեյմանիի գերեզման տանող ճանապարհին, պայթյուններ են որոտացել։ Պայթյունները գրանցվել են Սոլեյմանիի մահվան տարելիցին նվիրված մեծ հավաքի ժամանակ։
Իշխանությունները Քերմանում տեղի ունեցած պայթյուններն ահաբեկչական հարձակում են որակել։
Իրանական լրատվամիջոցները հայտնում են, որ գերեզմանատան մոտ երկու պայթուցիկ սարք է դրված եղել պայուսակների մեջ։ Սարքերը գործարկվել են հեռակառավարմամբ։