ԵՐԵՎԱՆ, 2 հունվարի – Sputnik. Թուրքիան թույլ չի տա իր նեղուցներով տեղափոխել Մեծ Բրիտանիայի` Ուկրաինային նվիրաբերած ականորսիչ նավերը։ Այս մասին հայտնում է ՌԻԱ Նովոստին՝ հղում անելով Թուրքիայի նախագահ Ռեջեփ Թայիփ Էրդողանի աշխատակազմի տարածած հաղորդագրությանը։
«Որոշ լրատվամիջոցների հայտարարությունն այն մասին, որ Մեծ Բրիտանիայի կողմից Ուկրաինային նվիրաբերված ականորսիչ նավերին թույլ են տվել թուրքական նեղուցներով անցնել Սև ծով, չի համապատասխանում իրականությանը։ Թուրքիան փակել է նեղուցները պատերազմող կողմերի (Ռուսաստան և Ուկրաինա) ռազմանավերի համար համաձայն Մոնտրյոյի կոնվենցիայի 19-րդ հոդվածի»,- նշված է հաղորդագրության մեջ։
Նշվում է, որ 1936 թվականից ի վեր Թուրքիան անաչառ և խստորեն կատարել է Մոնտրյոյի կոնվենցիան և պահպանել սկզբունքային դիրքորոշում այս պատերազմի ողջ ընթացքում՝ կանխելու լարվածության սրումը Սև ծովում։
«Մեր դաշնակիցները տեղեկացվել են, որ Մեծ Բրիտանիայի կողմից Ուկրաինային նվիրաբերված ականորսիչ նավերը չեն կարողանա թուրքական նեղուցներով անցնել Սև ծով, քանի դեռ պատերազմը շարունակվում է»,- գրված է հայտարարության մեջ։
Հիշեցնենք` 2022 թ–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։