ԵՐԵՎԱՆ, 30 դեկտեմբերի – Sputnik. Ադրբեջանի նախագահի օգնական Հիքմեթ Հաջիևը արդյունավետ և կառուցողական փոխգործակցություն է որակել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի վերջին շփումը: Տեղեկությունը հայտնում են թուրքական լրատվամիջոցները։
Ավելի վաղ տեղեկացրել էինք, որ Փաշինյանն ու Ալիևը դեկտեմբերի 26-ին հանդիպել են Սանկտ Պետերբուրգում ԱՊՀ ոչ պաշտոնական գագաթնաժողովի շրջանակում։ Ըստ ՀՀ վարչապետի մամուլի քարտուղար Նազելի Բաղդասարյանի` ոչ պաշտոնական շփման ժամանակ նրանք քննարկել են Հայաստան-Ադրբեջան խաղաղության օրակարգին վերաբերող հարցեր։ Քննարկումները եղել են երկկողմ ձևաչափով։
Հաջիևը նշել է, որ ադրբեջանական կողմը ձգտում է առաջ տանել խաղաղության գործընթացը և լուրջ խոչընդոտներ չի տեսնում Հայաստանի հետ խաղաղության պայմանագիր կնքելու համար:
Միաժամանակ նա չի խոսել փաստաթղթի ստորագրման հնարավոր ժամկետի մասին` նշելով, որ կողմերը շարունակում են բանակցել։
Նշենք, որ Ադրբեջանն ավելի վաղ Հայաստանին էր ուղարկել խաղաղության պայմանագրի նախագծի վերաբերյալ վերջին առաջարկների պատասխանը: Ինչպես հայտարարել էր Բայրամովը, Բաքուն ակնկալում է, որ կողմերի միջև հանդիպումներ կանցկացվեն 2024 թվականին: Նա ընդգծել էր, որ վերջին շրջանում իրենք դրական ազդակներ են ստանում Երևանից, բայց խաղաղության գործընթացի վերաբերյալ իրական գործողություններ են ակնկալում ՀՀ–ից:
Հիշեցնենք` 2021 թվականին Ադրբեջանի նախագահ Իլհամ Ալիևը հայտարարեց Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին փոխանցեց հարաբերությունների կարգավորման վերաբերյալ 5 կետից բաղկացած իր առաջարկը: Հայկական կողմը շտկումներ ավելացրեց և ուղարկեց իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
ՀՀ արտաքին գործերի նախարար Արարատ Միրզոյանը ՀՀ արտաքին գործերի նախարար Արարատ Միրզոյանը հոկտեմբերի 3-ին հայտնեց, որ Երևանի և Բաքվի միջև ընթանում է առաջարկների փոխանակման 6-րդ փուլը։
Հաջորդ օրը ՀՀ վարչապետ Նիկոլ Փաշինյանը հայտարարեց,որ երեք սկզբունք կա, որոնց շուրջ համաձայնության գալու դեպքում խաղաղության պայմանագիրը կստորագրվի։