ԵՐԵՎԱՆ, 29 դեկտեմբերի – Sputnik. Հնդկաստանը նախատեսում է արբանյակների գոտի ստեղծել տարբեր ուղեծրերում՝ առաջիկա հինգ տարում 50 արբանյակ արձակելով՝ տվյալներ հավաքելու համար: Այս մասին, ինչպես փոխանցում է ՌԻԱ Նովոստին՝ հղում անելով արտասահմանյան լրատվամիջոցներին, հայտարարել է Հնդկաստանի տիեզերական հետազոտությունների կազմակերպության նախագահ Սրիդհարա Սոմանաթը։
«Կարևոր է բարելավել արբանյակների՝ փոփոխությունները հայտնաբերելու ունակությունը, օգտագործել ավելի շատ մոտեցումներ՝ կապված արհեստական բանականության և տվյալների վերլուծության հետ; Տիեզերական ապարատներն ունակ են «դիտելու» ինչպես Հնդկաստանի սահմանները, այնպես էլ հարևան շրջանները», - ասել է Սոմանաթը:
Հնդկաստանի տիեզերական հետազոտությունների կազմակերպություններն արդեն կազմաձևել են արձակման համար նախատեսված 50 արբանյակները։
«Մենք կապ կունենանք արբանյակների միջև, այնպես որ, եթե ինչ-որ արբանյակ հայտնաբերի որևէ օբյեկտ, ապա 36 հազար կմ բարձրության վրա գտնվող գեոստացիոնար ուղեծրում գտնվող արբանյակը լայն տեսանելիություն կունենա։ Եթե որևէ ակտիվություն հայտնաբերվի, մենք կարող ենք ավելի ցածր ուղեծրում գտնվող մեկ այլ արբանյակի հանձնարարել շատ ավելի ճշգրիտ ստուգել՝ ավելի ճշգրիտ տեղեկատվություն ունենալու համար», - եզրափակել է Սոմանաթը:
Հնդկական տիեզերական հետազոտությունների կազմակերպությունը (ISRO) հնդկական տիեզերական գործակալություն է, որը հիմնադրվել է 1969 թվականին՝ հնդկական անկախ տիեզերական ծրագիր մշակելու համար: