ԵՐԵՎԱՆ, 29 դեկտեմբերի – Sputnik. Հայաստանի ֆուտբոլի ֆեդերացիան ամփոփել է Հայաստանի 2023 թ. լավագույն ֆուտբոլիստի քվեարկության արդյունքները։ Տեղեկությունը հայտնում է ՀՖՖ մամուլի ծառայությունը։
Քվեարկությանը մասնակցել են Հայաստանի ֆուտբոլային ակումբները, ինչպես նաև մարզական լրատվամիջոցները։ Ֆուտբոլային ակումբներից մասնակցել են «Ալաշկերտ»–ը, «Արարատը», «Արարատ–Արմենիան», «ԲԿՄԱ»–ն, «Նոան», «Շիրակը», «Վանը», «Վեստ Արմենիան», «Փյունիկը»։ «Ուրարտու» ակումբը չի ներկայացրել քվեարկության իր տարբերակը։
Հավաքելով 81 միավոր՝ 2023թ․ լավագույն ֆուտբոլիստ է ճանաչվել իտալական «Ինտերի» կիսապաշտպան Հենրիխ Մխիթարյանը։ Ի դեպ, Մխիթարյանը 2022-ի մարտից Հայաստանի ֆուտբոլի հավաքականի անդամ չէ։
Երկրորդ հորիզոնականը 48 միավորով զբաղեցրել է Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանը։
21 միավորով երրորդ հորիզոնականը զբաղեցրել է Հայաստանի ազգային հավաքականի և «Ալ Ֆաթեհի» կիսապաշտպան Լուկաս Սելարայանը: