ԵՐԵՎԱՆ, 27 դեկտեմբերի – Sputnik. «Վետո» շարժման ղեկավար Նարեկ Մալյանը կշարունակի մնալ անազատության մեջ: Տեղեկությունը հայտնում է փաստաբան Տիգրան Աթանեսյանը։
Այսօր փաստաբանը ստացել է Վերաքննիչ քրեական դատարանի դատավոր Ռուբիկ Մխիթարյանի որոշումը։ Դատավորն ուժի մեջ է թողել դատավոր Սուսաննա Գզոգյանի` Նարեկ Մալյանին կալանքի տակ պահելու որոշումը։
«Իհարկե, որևէ այլ որոշում Ռ.Մխիթարյանից սպասելը կլիներ ծայրահեղ միամտություն: Դատավորները խիստ տպավորված են և անհանգստացած Ն.Մալյանի հայտարարությամբ, որ ինչ արել է, լավ է արել, էլի է անելու»,- ֆեյսբուքյան էջում գրել է Աթանեսյանը։
Հիշեցնենք` ավելի վաղ «Չաուշեսկուի գնդակահարությունը կամ մահ դավաճաններին» ֆուտուրիստական ներկայացումը բեմադրելու համար Մալյանին մեղադրանք էր ներկայացվել ՀՀ քրեական նախկին օրենսգրքի 226.2 հոդվածով։
Այս տարվա հունիսի 30–ին Նարեկ Մալյանին արդարացրեց Չաուշեսկուի գնդակահարությունը բեմադրելու գործով։
Մալյանը կրկին ձերբակալվեց սեպտեմբերի 20-ին, 2 օր անց կալանավորվեց։ Մեղադրվում է ատելության, խտրականության, թշնամանքի և անհանդուրժողականության գործով։
Վերջին անգամ Մալյանի կալանքի ժամկետը երեք ամսով երկարաձգվեց նոյեմբերի 15-ին Երևանի քրեական դատարանի դատավոր Սուսաննա Գզոգյանի որոշմամբ, որը բավարարեց մեղադրող դատախազի միջնորդությունը։