ԵՐԵՎԱՆ, 26 դեկտեմբերի - Sputnik. Գազայի հատվածում իսրայելական հարվածների հետևանքով զոհերի թիվը հասել է 20 915–ի, վիրավորների թիվը` 54 918–ի: Այս մասին հայտնել Է պաղեստինյան անկլավի առողջապահության նախարարության ներկայացուցիչ Աշրաֆ ալ–Կուդրան։
«Հոկտեմբերի 7–ից իսրայելական ագրեսիայի հետևանքով զոհերի թիվը հասել է 20 915–ի, ևս 54 918 մարդ վիրավորվել է»,– ասվում է Գազայի հատվածում պաղեստինյան առողջապահության նախարարության Telegram ալիքում Ալ Կուդրայի հայտարարության մեջ:
Առողջապահության նախարարության ներկայացուցիչը նաև նշել է, որ վերջին մեկ օրվա ընթացքում Գազայում կրակոցների հետևանքով զոհվել է 241 մարդ:
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։
Իսրայելը և Գազայի հատվածում իշխող պաղեստինյան ՀԱՄԱՍ շարժումը Կատարի միջնորդությամբ նոյեմբերի 22-ին ձեռք բերեցին հակամարտության սրացումից ի վեր առաջին մասշտաբային պայմանավորվածությունը. կողմերը համաձայնեցին չորս օրով դադարեցնել ռազմական գործողությունները` միմյանց մոտ գտնվող տասնյակ պատանդների և ձերբակալվածների փոխանակման համար: Ավելի ուշ հրադադարը երկարաձգվեց մինչև նոյեմբերի 30-ը։
Դեկտեմբերի 1-ի առավոտյան Իսրայելի և ՀԱՄԱՍ-ի միջև հրադադարի ժամկետը լրացավ։ Իսրայելի պաշտպանության բանակը (ՑԱԽԱԼ) հայտարարեց, որ պաղեստինյան ՀԱՄԱՍ շարժումը խախտել է ռազմական գործողությունների դադարն ու կրակ է բացել իսրայելական տարածքի վրա, իսրայելցի զինվորականները վերսկսեցին ռազմական գործողությունները Գազայի հատվածում պաղեստինյան շարժման դեմ: