ԵՐԵՎԱՆ, 26 դեկտեմբերի – Sputnik. Անցնող տարվա գլխավոր արդյունքը հայ ծանրորդների հաջող ելույթներն էին ու աշխարհի և Եվրոպայի առաջնություններում վաստակած մեծ թվով մեդալները։ Այսօր հրավիրված ասուլիսի ժամանակ այս հայտարարությունն արեց Հայաստանի ծանրամարտի հավաքականի գլխավոր մարզիչ Փաշիկ Ալավերդյանը` ամփոփելով 2023 թվականը:
2023 թվականին հայ ծանրորդները վաստակել են 57 մեդալ, որոնցից 20–ը` ոսկե, 15–ը` արծաթե, 22–ը` բրոնզե։
Խոսելով հաջորդ տարի Փարիզում կայանալիք օլիմպիական խաղերի մասին` Ալավերդյանը նշեց, որ յուրաքանչյուր երկիր իրավունք ունի ներկայացնելու վեց ծանրորդ` երեք տղամարդ և երեք կին:
«Տղամարդկանց մրցումներում մենք ունենք 5 ծանրորդ, որոնցից կընտրենք լավագույն երեքին, որոնք կմասնակցեն օլիմպիական խաղերին։ Նրան արդեն վարկանիշ ունեն։ Ընդ որում` յուրաքանչյուր քաշային կարգում մեկական մարզիկ պետք է ներկայացնենք։Իսկ ահա կանանց մրցումներում վարկանիշ դեռ չունենք, բայց կան 4 մարզուհիներ, որոնք շատ մոտ են վարկանիշ վաստակելուն։ Փետրվարին Եվրոպայի առաջնությունից ու աշխարհի գավաթի խաղարկությունից հետո պարզ կլինի, թե ով Փարիզում հանդես գալու իրավունք կվաստակի», - ասաց հավաքականի գլխավոր մարզիչը։
Ալավերդյանը խոսեց նաև խնդիրների մասին, որոնք կապված են մարզումային պրոցեսի, մարզիկներին բանակ զորակոչելու ու նույնիսկ մրցաշարերի մեկնելու տոմսերի հետ։