ԵՐԵՎԱՆ, 22 դեկտեմբերի – Sputnik. ՀՀ–ի նկատմամբ ԼՂ ունեցած 315 մլրդ դրամ պարտքի մեջ մտնում են նաև ԼՂ–ում հիփոթեքային վարկերով ձեռք բերված տների գումարները, որոնք կազմում են 14 մլրդ դրամ։ ՀՀ Ազգային ժողովում այս մասին հայտարարեց ՀՀ ֆինանսների նախարար Վահե Հովհաննիսյանը` ներկայացնելով 2023 թ. պետական բյուջեում լրացումներ ու փոփոխություններ կատարելու մասին նախագիծը։
Ավելի վաղ հայտնել էինք, որ ՀՀ–ի նկատմամբ ԼՂ կառավարության շուրջ 315 մլրդ դրամի պարտավորությունը կանցնի ՀՀ–ին, որի 70 տոկոսն իր վրա կվերցնի ՀՀ կառավարությունը, իսկ 30 տոկոսը` ՀՀ բանկերը։
Նախարարը նշեց, որ ԼՂ պարտքն ավելի շատ է եղել, ու ՀՀ կառավարությունը ֆիլտրեր է կիրառել, թե որ տեսակի պարտավորությունները կարող են մտնել այս գումարի մեջ։
«Եթե պարզվի` ԼՂ որոշ վարկերի դեպքում եղել են չարաշահումներ կամ պարտավորությունների չկատարում, ապա մենք դրանց հետևից կգնանք ու վերադարձման պահանջ կներկայացնենք»,– վստահեցրեց նախարարը։
Հովհաննիսյանը թվարկեց այն դեպքերը, երբ ՀՀ կառավարությունը չի փոխհատուցի. «Եթե ԼՂ–ում վարկ են վերցրել, սակայն բիզնեսը ՀՀ–ում է, եթե վարկ են վերցրել, սակայն գրավը ՀՀ–ում է։ Այս մարդկանց չի վերաբերի մեր պարտավորությունը։ Նշեմ, որ անգրավ վարկերը ևս չեն մտել մեր կազմած փոխհատուցման այս ցուցակի մեջ, քանի որ ենթադրելի է, որ այստեղ կարող են կեղծ գործարքներ տեղի ունեցած լինել»։
Հովհաննիսյանը նշեց` եթե քաղաքացին հիփոթեքային վարկ է վերցրել ու բնակարան ձեռք բերել ԼՂ–ում, ապա նրա գումարն ամբողջովին կներվի։