ԵՐԵՎԱՆ, 22 դեկտեմբերի – Sputnik. ՀՀ–ի նկատմամբ ԼՂ կառավարության ունեցած պարտքը կավելացնի ՀՀ պարտք–ՀՆԱ հարաբերակցությունը 2.4 տոկոսային կետով։ ՀՀ Ազգային ժողովում այս մասին հայտարարեց ՀՀ ֆինանսների նախարար Վահե Հովհաննիսյանը` ներկայացնելով 2023 թ. պետական բյուջեում լրացումներ ու փոփոխություններ կատարելու մասին նախագիծը։
Ավելի վաղ հայտնել էինք, որ ՀՀ նկատմամբ ԼՂ կառավարության շուրջ 315 մլրդ դրամի պարտավորությունը կանցնի ՀՀ–ին։
Նախարարը պատասխանում էր ՀՀ ԱԺ «Հայաստան» խմբակցության պատգամավոր Թադևոս Ավետիսյանի այն հարցին, թե արդյոք այս շուրջ 315 մլրդ դրամը հետագայում չի՞ բերի ՀՀ ֆինսաբանկային համակարգում ռիսկերի և այս բեռը համակարգը կարո՞ղ է իր վրա վերցնել առանց էական ցնցումների։
ՀՀ ֆինանսների նախարար Վահե Հովհաննիսյանն ի պատասխան նշեց, որ այս հարցը շատ երկար ու մանրակրկիտ քննարկվել է, արվել են համապատասխան վերլուծություններ։
«Վստահեցնում եմ` հաշվի առնելով ՀՀ շահերը, պարտքի շեմի հետ կապված խնդիրները` մեզ համար շատ կարևոր է եղել, որ գտնենք այնպիսի լուծում, որը բանկային համակարգի համար մեծ սթրես չի առաջացնի։ Եթե առանձին բանկերի հաշվեկշռի հետ կապված խնդիրներ առաջանան, ապա մենք առանձին ուծումներ կգտնենք»,– ընդգծեց նա։
Հովհաննիսյանը հաստատեց, որ ԼՂ պարտքը ՀՀ ներքին պարտքի վրա ազդեցություն ունենալու է. պարտք–ՀՆԱ հարաբերակցության վրա այն կունենա 2.4 տոկոսային կետով ազդեցություն, այսինքն` եթե հիմա մոտ 47 տոկոս է պատք–ՀՆԱ հարաբերակցությունը, ապա այն կդառնա 49.4 տոկոս։
Թադևոս Ավետիսյանը նաև հետաքրքրվեց` արդյոք այս հարցում չպե՞տք է պատասխանատվության ենթարկվի Ադրբեջանը, կա՞ն արդյոք միջազգային մեխանիզմներ` փոխհատուցման այս հարցը լուծելու համար ու այդ բեռը միայն ՀՀ կառավարության վրա չթողնելու։
Ի պատասխան նախարար Հովհաննիսյանն ասաց, որ վստահ է` ՀՀ–ն պատշաճ ջանքեր կիրականացնի այդ գումարների գոնե մի մասը վերականգնելու ուղղությամբ։