ԵՐԵՎԱՆ, 21 դեկտեմբերի – Sputnik. ՀՀ իշխանությունները կարգելափակեն արտասահմանյան առցանց խաղատների կայքերը, որոնք աշխատում են առանց արտոնագրի: «Շահումով խաղերի մասին» և հարակից օրենքներում համապատասխան փոփոխությունների նախագիծը հավանության արժանացավ ՀՀ կառավարության այսօրվա նիստի ժամանակ:
Մեկ այլ փոփոխության համաձայն` ՀՀ քաղաքացի չհանդիսացող անձինք, որոնք այցելում են երկրում տեղակայված խաղատներ, կկարողանան խաղադրույքներ կատարել և շահումներ ստանալ արտարժույթով։ Այդպիսով, ըստ գործադիր մարմնի, երկրի խաղային ինդուստրիան ավելի գրավիչ կդառնա զբոսաշրջիկների համար։ Զուգահեռ նախատեսվում է բարձրացնել փողերի լվացման դեմ վերահսկողության պահանջները:
Այդ նպատակով խաղատները պետք է անցնեն տարեկան ֆինանսական աուդիտ, ընդ որում` միայն այնպիսի կազմակերպությունների կողմից, որոնք ունեն առնվազն 5 ձեռնարկություններում աուդիտի փորձ, իսկ աուդիտորները ունեն միջազգային սերտիֆիկացում: