ԵՐԵՎԱՆ, 21 դեկտեմբերի – Sputnik. Էստոնիայի արտգործնախարար Մարգուս Ցահքնան կարծում է, որ Օսմանյան կայսրությունում Հայոց ցեղասպանությունը ճանաչելու իր կոչը չի վատացնի Էստոնիայի հարաբերությունները Թուրքիայի հետ: Այս մասին հայտնում է ՌԻԱ Նովոստին։
Ավելի վաղ Ցահքնան հայտարարել էր, որ Էստոնիան պետք է ճանաչի Հայոց ցեղասպանությունը` հայտարարելով, որ մտադիր է խորհրդարանում ճանաչման գործընթաց նախաձեռնել: Հայոց ցեղասպանության ճանաչման հարցը քննարկվել է Երևանում դեկտեմբերի կեսերին Ցահքնայի և հայ գործընկեր Արարատ Միրզոյանի հանդիպման ժամանակ:
Էստոնիայի ԱԳՆ ղեկավարը ընդգծել է, որ իր խոսքերի մեջ ոչ մի նոր բան չկա, քանի որ Էստոնիայի նախկին նախագահ Առնոլդ Ռյույտելն արդեն նման կարծիք է հայտնել 2004 թվականին:
«Իմ արտահայտած դիրքորոշումը չի վատացնի մեր հարաբերությունները դաշնակից Թուրքիայի հետ։ Մենք անընդհատ շփվում ենք միմյանց հետ և սեփական դիրքորոշման իրավունք ունենք։ Որպես արտգործնախարար՝ ես արտահայտել եմ այն դիրքորոշումը, որը մեզ մոտ ձևավորվել է։ Թե ինչպիսին կլինեն խորհրդարանի հետագա քայլերը, արդեն խորհրդարանի իրավասության շրջանակում է։ Թող քննարկումները շարունակվեն, դա հրատապ հարց չէ», - այսօր ERR պետական հեռուստառադիոհեռարձակման հարթակին ասել է Ցահքնան։
Հիշեցնենք` Հայոց ցեղասպանությունն առաջինը պետական մակարդակով ճանաչել է Ուրուգվայը 1965 թվականին, այնուհետև նրա օրինակին են հետևել ևս 27 երկրներ` Արգենտինան, Ավստրիան, Բելգիան, Բոլիվիան, Բրազիլիան, Կանադան, Չիլին, Կիպրոսը, Չեխիան, Դանիան, Գերմանիան, Հունաստանը, Լատվիան, Լիտվան, Լյուքսեմբուրգը, Նիդեռլանդները, Պարագվայը, Լեհաստանը, Պորտուգալիան, Ռումինիան, Ռուսաստանը, Սիրիան, Սլովակիան, Շվեդիան, Շվեյցարիան, Ֆրանսիան, ԱՄՆ-ն։
Հայոց ցեղասպանությունը ճանաչելու մասին նաև հռչակագրեր և բանաձևեր են ընդունել մի շարք միջազգային կազմակերպություններ և միջազգային կառույցներ, այդ թվում՝ Եվրոպայի խորհուրդը և Եվրոպական խորհրդարանը, ինչպես նաև տարբեր երկրների վարչատարածքային միավորներ՝ նահանգներ և քաղաքներ։