ԵՐԵՎԱՆ, 21 դեկտեմբերի - Sputnik. ՀՀ բարձր տեխնոլոգիական արդյունաբերության նախարար Ռոբերտ Խաչատրյանը չի կարող մեկնաբանել Sputnik Արմենիա ռադիոկայանի հեռարձակումը 30 օրով կասեցնելու որոշումը, քանի որ որոշում կայացնողն իր ղեկավարած գերատեսչությունը չի եղել։ Այս մասին նախարարը հայտարարեց այսօր կառավարության նիստից հետո լրագրողների հետ ճեպազրույցի ժամանակ։
«Սա ինչի՞ հետևանք եք Դուք համարում ռադիոկայանի գործունեության դադարեցումը թեկուզ 1 ամսով, ի վերջո «ժողովրդավարության բաստիոնում» ենք ապրում»,- նախարարին հարց ուղղեց Irakanum.am-ի գլխավոր խմբագիր Փայլակ Ֆահրադյանը։
«Ես չեմ կարող մեկնաբանել, քանի որ մենք չենք դադարեցնողը եղել, որոշումը մենք չենք կայացրել, ավելի մանրամասն մեկնաբանություն երևի որոշում կայացնողից է պետք ուզել»,- ասաց նախարարը։
Լրագրողը փորձեց նախարարի՝ իբրև կառավարության ներկայացուցչի կարծիք լսել, սակայն Խաչատրյանը հրաժարվեց ցանկացած մեկնաբանությունից։
Հիշեցնենք` ՀՌՀ-ի այսօրվա այսօրվա նիստում որոշվել է 30 օրով կասեցնել Sputnik Արմենիա ռադիոկայանի հեռարձակումը, վերահեռարձակող «Տոսպա» ռադիոընկերությունը մեկ ամսով զրկվել է լիցենզիայից։ Վարչական 2 վարույթ է հարուցվել ընկերության նկատմամբ և տուգանք նշանակել 500 հազար դրամի չափով։ Վարույթներից մեկը վերաբերում է «Ուրբաթը Տիգրան Քեոսայանի հետ» հաղորդման նոյեմբերի 17-ի եթերին, որի ընթացքում, ըստ հանձնաժողովի, հաղորդավարը բռնության կոչեր է հնչեցրել։ Մյուս վարույթը վերաբերում է «Աբովյան Time» հաղորդմանը։
Հավելենք, որ ՀՌՀ-ի որոշման մեջ նշված նոյեմբերի 17-ի «Ուրբաթը Տիգրան Քեոսայանի հետ» հաղորդման ընթացքում հեղինակը սուր խոսքեր է ասում վարչապետ Նիկոլ Փաշինյանի և նրա գործողությունների վերաբերյալ, բայց Հայաստանի Հանրապետությանն ու հայ ժողովրդին ուղղված որևէ վիրավորական խոսք չկա։ Ինչ վերաբերում է «Աբովյան Time» հաղորդմանը, ապա ՀՌՀ-ի նշած «ոչ հավաստի, չստուգված տեղեկությունները» հեղինակ Արման Աբովյանի կարծիքն է եղել. «Եթե առաջ կոնցեպտն էր՝ Ղարաբաղը տանք, հանգիստ ապրենք, հիմա՝ Տավուշը տանք, հանգիստ ապրենք, Սյունիքը տանք, հանգիստ ապրենք, Գեղարքունիքը տանք, հանգիստ ապրենք․․․»։