ԵՐԵՎԱՆ, 21 դեկտեմբերի – Sputnik. Sputnik Արմենիա ռադիոկայանի «Մենք» հաղորդաշարի հեղինակ Աշոտ Գևորգյանի հանդեպ հանրային քրեական հետապնդում չի հարուցվի։ Տեղեկությունը Sputnik Արմենիայի հետ զրույցում ասաց Գևորգյանի փաստաբան Լիաննա Գրիգորյանը։
Փաստաբանի խոսքով` դեկտեմբերի 20–ին Աշոտ Գևորգյանի հանդեպ հանրային քրեական հետապնդում չհարուցելու վերաբերյալ միջնորդություն է ներկայացվել Սյունիքի մարզի դատախազի տեղակալ Գրիգոր Մինասյանին։
«Միջնորդությունը ներկայացվել է այն հիմքով, որ քրեական վարույթով ձեռք բերված փաստական տվյալներով հիմնավորվել է` Աշոտ Գևորգյանը տեղյակ չի եղել, որ իր վարած մեքենայում հրազեն կա և առնչություն չի ունեցել հրազենի իրացման հանցավոր դեպքի հետ»,–ասաց Գրիգորյանը։
Նրա խոսքով` միջնորդությունը բավարարել է Սյունիքի մարզի դատախազը` Գևորգյանի կողմից այդ արարքը կատարած չլինելու հիմքով։ Նշենք, որ այդ գործով Գևորգյանն ունի վկայի կարգավիճակ։
Ավելի վաղ տեղեկացրել էինք, որ առերևույթ հանցանք կատարած լինելու անմիջականորեն ծագած հիմնավոր կասկածի առկայության հիմքով 2023թ. սեպտեմբերի 6-ին և 7-ին 7 անձ Սյունիքի մարզում ձերբակալվել և ներկայացվել էին վարույթն իրականացնող մարմնին:
Նրանց թվում էին Աշոտ Գևորգյանն ու ռուսամետ բլոգեր Միկա Բադալյանը, որոնք վկայի կարգավիճակով ազատ արձակվեցին սեպտեմբերի 8-ին։