ԵՐԵՎԱՆ, 20 դեկտեմբերի – Sputnik. ԵՄ դիվանագիտության ղեկավար Ժոզեպ Բորելը կարծում է, որ աշխարհում գնալով ավելի կարևոր է դառնում հաղթող քաղաքական գործչի անձը և եվրոպացիների համար չափազանց կարևոր է, թե ով կհաղթի ԱՄՆ գալիք ընտրություններում։ Նրա խոսքը մեջբերում է ՌԻԱ Նովոստին։
«Գնալով ավելի կարևոր է դառնում, թե ով է կառավարում երկիրը: Թե ով կլինի Միացյալ Նահանգների հաջորդ նախագահը, շատ–շատ կարևոր հարց է մեզ՝ եվրոպացիներիս համար», - ասել է նա «Sommet Grand Continent» համաժողովի ժամանակ:
Բորելը հավելել է, որ ԱՄՆ-ում կայանալիք ընտրությունները կարող են ավելի բարենպաստ սցենար տալ Ռուսաստանին։
Խոսելով 2024 թվականին ԵՄ երկրներում և եվրոպական կառույցներում կայանալիք ընտրությունների մասին՝ Բորելը վստահություն է հայտնել, որ դրանց վրա էական ազդեցություն կունենան Ուկրաինայի և Մերձավոր Արևելքի հակամարտությունները։
«Այս հակամարտությունները մեզ համար ունեն անմիջական հետևանքներ, դրանք ազդում են անվտանգային վիճակի վրա, հետևաբար, իհարկե, ազդեցություն կունենան ընտրությունների վրա... Ես վախենում եմ մեր ընտրողների վախից, վախենում եմ, որ նրանք կքվեարկեն վախի զգացումով... Քանի որ անհայտության և անկայունության վախը ստիպում են ընտրել նրանց, ովքեր անվտանգություն են առաջարկում», - ասել է Բորելը` բացատրելով եվրոպական երկրներում կայացած ընտրություններում աջ ուժերի հաջողության ֆենոմենը։
Նա ընդգծել է, որ այդ քաղաքական գործիչները խաղադրույք են կատարել ընտրողների վախերի վրա։
Հիշեցնենք` ԱՄՆ-ում նախագահական ընտրությունները նշանակված են 2024 թվականի նոյեմբերի 5-ին։