«Ես մամուլից եմ իմացել». Փաշինյանը մեկնաբանել է ԼՂ–ի մասով Պուտինի հայտարարությունը

ԵՐԵՎԱՆ, 19 դեկտեմբերի – Sputnik. ՀՀ վարչապետ Նիկոլ Փաշինյանը մեղադրեց ՌԴ նախագահ Վլադիմիր Պուտինին 2020 թվականի եռակողմ հայտարարությանը հակասելու համար։ Փաշինյանը նման մեղադրանք հնչեցրեց Հանրային հեռուստաընկերության եթերում` մեկնաբանելով ՌԴ նախագահի այն հայտարարությունը, որ ՀՀ–ն է հրաժարվել ԼՂ–ից` այն ճանաչելով Ադրբեջանի մաս, իսկ ՌԴ–ին տեղյակ չեն պահել։

Այնուհետև Փաշինյանը հայտարարեց, որ 2020 թվականի 44–օրյա պատերազմից հետո, երբ Ադրբեջանը ռազմական գործողություններ է կատարել ՀՀ–ի և ԼՂ–ի դեմ Հայաստանը դիմել Է ինչպես ՀԱՊԿ–ին, այնպես էլ ՌԴ–ին, բայց համապատասխան արձագանք չի ստացել։

«Բոլոր դեպքերում ստացել ենք 0 արձագանք»,–ասաց նա։

ՀՀ վարչապետը նաև հիշեցրեց, որ 2022 թվականի փետրվարին Ռուսաստանի և Ադրբեջանի միջև հռչակագիր է ստորագրվել , որով երկու երկրների հարաբերությունները բարձրացվել են ստրատեգիական մակարդակի և կողմերը պայմանավորվել են չկատարել այնպիսի գործողություններ, որ մյուս կողմի մեկնաբանությամբ կհակասեն իրենց ազգային շահերին։

Արձագանքելով ՌԴ ԱԳՆ–ի այն հայտարարություններին, որ հենց Հայաստանը չի կատարել եռակողմ հայտարարության կետերը` Փաշինյանը խորհուրդ տվեց կարդալ եռակողմ հայտարարությունը, 8–րդ կետը ներառյալ, տեսնել` ով ինչ կետ չի կատարել։

Նշենք, որ ՀՀ վարչապետը Պուտինի հայտարարություն ասելով նկատի ունի ՌԴ նախագահի` հարցազրույցներից մեկում ասած հետևյալ միտքը. «Միջազգային իրավական տեսակետից այդ տարածքները (Լեռնայի Ղարաբաղը) Ադրբեջանի Հանրապետության անբաժանելի մասն են, Հայաստանն ինքը չի ճանաչել Լեռնային Ղարաբաղի անկախությունը, և նկատի ունենալով այս հանգամանքը, ԼՂ–ն միջազգային իրավունքի տեսանկյունից նույնպես Ադրբեջան է»։