«Հրազդանի կիրճում մարզվող քաղաքացիների անվտանգությունն ապահովելու և առողջ ապրելակերպը բնակիչների շրջանում խթանելու նպատակով շաբաթ և կիրակի օրերին ժամը 6-ից 23-ը կիրճով ավտոմեքենաների երթևեկությունը կարգելվի», Երևանի քաղաքապետարանի գործակարգավարական նիստի ժամանակ երեկ հայտնել է քաղաքապետարանի տրանսպորտի վարչության պետի պաշտոնակատար Վազգեն Հարությունյանը:
Մի քանի տարի է, ինչ Հրազդանի կիրճի այդ հատվածում մարդիկ մարզվում են մայթեզրին տեղադրված մարզասարքերի վրա։ Երթևեկության հետ կապված էլ մինչ օրս, համենայնդեպս հրապարակային միջադեպ չի գրանցվել։
Կենտրոնի ծանրաբեռնվածությունից խուսափելու համար վարորդները շատ հաճախ օգտվում են Հրազդանի կիրճից, քանի որ այն շրջանցում է հնարավոր բոլոր խցանումներն ու ճյուղավորված ելք ապահովում քաղաքի տարբեր հատվածներ։ Քաղաքապետարանի հերթական որոշումը հանրային գործիչ Էդուարդ Բադալյանը Sputnik Արմենիայի հետ զրույցում տարակուսելի է որակել։