ԵՐԵՎԱՆ, 16 դեկտեմբերի – Sputnik. Թուրքիայի կենտրոնական բանկի նախագահ Հաֆիզե Գայե Էրքանը դժգոհել է Ստամբուլում անշարժ գույքի վարձակալության բարձր գներից։
«Hürriyet» թերթին տված հարցազրույցում Էրքանը նշել է, որ Թուրքիայում բնակարանների վարձակալության գները սկսել են աստիճանաբար նվազել, սակայն ընդգծել է, որ ընդհանուր առմամբ հավասարակշռությունը խախտվել է սոցիալական բնակարանների պակասի պատճառով:
«Պետք է լինի ոչ թե տասը բնակարան մեկ անձի համար, այլ մեկական բնակարան տասը մարդու համար․.. Ստամբուլում վարձով տներն ավելի թանկ են, քան Մանհեթենում, ինչպե՞ս դա կարող է լինել։ Մենք չկարողացանք բնակարան գտնել Ստամբուլում, դրանք չափազանց թանկ են։ Մենք հիմա ապրում ենք մեր մայրերի հետ», - հայտարարել է Էրքանը։
Թուրքիայի ԿԲ-ն ավելի վաղ հայտարարել էր, որ անշարժ գույքի գները երկրում 2022 թվականի սեպտեմբերից մինչև ընթացիկ տարվա հուլիս աճել են ավելի քան 89%-ով, մի շարք շրջաններում՝ մինչև 130%։
Թուրքիայի նախագահ Ռեջեփ Թայիփ Էրդողանը նախընտրական քարոզարշավի ընթացքում խոստացել է լուծել անշարժ գույքի վարձակալության անընդհատ աճող գների խնդիրը: Իշխանությունը քննարկում է դատարկ բնակարանների սեփականատերերի համար հարկ սահմանելու տարբերակը, քանի որ մի շարք տանտերեր նախընտրում են ոչ թե հանձնել բնակարանները, այլ սպասել լիրայի փոխարժեքի կայունացմանը կամ գտնել վարձակալի, որը պատրաստ է պայմանագիր կնքել դոլարով: