ԵՐԵՎԱՆ, 16 դեկտեմբերի – Sputnik. Հայ–ռուսական գործարար խորհրդի վերագործարկումը 2 երկրի գործարարների համար կարող է լավ հնարավորություն դառնալ համագործակցությունը զարգացնելու և իրենց բիզնեսն ընդլայնելու համար։ Այս մասին Sputnik Արմենիա մուլտիմեդիոն մամուլի կենտրոնում ասաց Ռուս-հայկական գործարար խորհրդի փոխնախագահ Էդմոն Էվոյանը։
Նա ընդգծեց, որ Հայաստանի և Ռուսաստանի տնտեսական միջկառավարական հանձնաժողովի նիստի շրջանակում քննարկվել են համագործակցության հնարավորությունները։ Ստորագրվել են նաև առցանց կրթության, զբոսաշրջության, թեթև արդյունաբերության զարգացման վերաբերյալ փաստաթղթեր: Նա վստահեցրեց, որ խորհուրդն առավելագույն ջանքեր կգործադրի, որպեսզի հայկական ընկերությունները կարողանան մուտք գործել ռուսական շուկա, իսկ ռուսական ընկերությունները ձեռնարկություններ բացեն և աշխատատեղեր ստեղծեն Հայաստանում:
«Հայ գործարարների համար ՌԴ–ն դարձել է կարևոր շուկա։ Շուկան ազատ է և ծավալուն։ Հայկական արտադրանքը որակյալ է, և ռուս գնորդը գնահատում է դա»,– ասաց նա։
Էդմոն Էվոյան
© Sputnik / Aram Nersesyan
Գործարարը վստահ է` Ռուսաստանի դեմ պատժամիջոցների կիրառումից հետո հայ ձեռնարկատերերի համար աշխատանքի նոր հնարավորություններ են բացվել ռուսական շուկայում։ Խոսքը սննդամթերքի, տեղեկատվական տեխնոլոգիաների և մեքենաշինության մասին է։ Ավելին` արտասահմանյան ապրանքներից շատերն արդեն փոխարինվել են հայկականով. 4.4 մլրդ դոլարի հասած ապրանքաշրջանառությունը դրա ապացույցն է։
Ռուս–հայկական գործարար խորհրդի գործադիր տնօրեն Գեորգի Վաժինսկին կարծում է, որ Հայաստանը մեծ ներուժ ունի մի շարք ոլորտներում` գյուղատնտեսությունից մինչև էկոտուրիզմ։
«Մեծ ներուժ ունի Հայաստանի տեքստիլ արդյունաբերությունը ։ Ռուսաստանում այդ ոլորտում արդեն կադրերի խնդիր կա։ Կարելի է դիտարկել ռուսական արտադրողների կողմից Հայաստանում արտադրություն հիմնելու և այն արտերկիր արտահանելու տարբերակը»,– ընդգծեց Վաժինսկին։
Գեորգի Վաժինսկի
© Sputnik / Aram Nersesyan
Ռուս-հայկական գործարար խորհուրդը Ռուսաստանի և Հայաստանի գործարար համայնքի համագործակցության խորացման արդիական հարցերի քննարկման հարթակ է: Խորհրդի գործառույթներից է հայ գործարարների իրավունքների և օրինական շահերի պաշտպանությունը ռուսական և հայկական պաշտոնական ու առևտրային կառույցների հետ փոխհարաբերություններում: Ռուսական կողմից գործարար խորհրդի համանախագահն է «Wildberries» ընկերության գլխավոր տնօրեն Տատյանա Բակալչուկը: Խորհրդի հայկական կողմի համանախագահ է նշանակվել «Երևան Սիթի» սուպերմարկետների ցանցի տնօրեն Շողերինա Մկրտչյանը: