ԵՐԵՎԱՆ, 14 դեկտեմբերի – Sputnik. ՀՀ կառավարությունը Արարատի մարզում մետալուրգիական գործարանի կառուցման համար հողատարածք է հատկացրել շինարարությունը սկսելուց 4 ամիս անց։
Դեռ սեպտեմբերին Sputnik Արմենիան (չնայած սեփականատիրոջ հերքումներին) գրել էր, որ Երասխում հայ–ամերիկյան մետալուրգիական գործարանի կառուցման վայրը փաստացի տեղափոխվել է Արարատ քաղաքի հարակից տարածք:
Արարատի մարզի նույնանուն գյուղի վարչական տարածքում 8,9 հա հողատարածքն անհատույց հատկացնելու մասին համապատասխան որոշումն ընդունվել է ՀՀ կառավարության այսօրվա նիստի ժամանակ. որոշումը ներառված էր օրակարգի չքննարկվող հարցերի շարքում:
Այնուամենայնիվ, արբանյակային կադրերը ցույց են տալիս, որ այս տարածքում շինարարությունը սկսվել է դեռևս 2023 թ. հուլիսի վերջին՝ հողատարածքը գործարանի սեփականատիրոջը՝ GTB Steel–ին հանձնելուց մի քանի ամիս առաջ:
Ավելին, Արարատ համայնքի կայքից տեղեկանում ենք, որ գործարանի կառուցման` շրջակա միջավայրի վրա ազդեցության վերաբերյալ նախնական հասարակական լսումներն անցկացվել են օգոստոսին (առաջին փուլ) և նոյեմբերին (երկրորդ փուլ), երբ շինարարությունն արդեն ընթանում էր:
ՀՀ շրջակա միջավայրի նախարարության կայքում կարելի է գտնել շրջակա միջավայրի ազդեցության գնահատման (ՇՄԱԳ) դրական եզրակացությունը, սակայն այն վերաբերում է Երասխ գյուղում շինարարությանը, իսկ Արարատի մասով ոչինչ չկա։
Մեզ չհաջողվեց կապ հաստատել GTB Steel–ի ներկայացուցչի հետ մեկնաբանություն ստանալու համար:
Հիշեցնենք, որ ի սկզբանե Երասխում կառուցվող գործարանի շինարարության հնարավոր տեղափոխման մասին պաշտոնապես սկսել էին խոսել սեպտեմբերին։ Դրան նախորդել են Ադրբեջանի ԶՈւ դիրքերից գործարանի տարածքի վրա բազմաթիվ գնդակոծությունները։
Գործարանի սեփականատերերն են ամերիկյան Virtual Funding և CESI Global Investments ընկերությունները (GTB Steel ընկերության միջոցով):
Հուլիսի 14–ին նրանք համատեղ հայտարարությամբ դիմել էին Ադրբեջանին՝ զգուշացնելով, որ անզեն աշխատողների ուղղությամբ ադրբեջանական զինված ուժերի գնդակոծությունների վերսկսման դեպքում իրենք դա կդիտարկեն որպես ուղիղ հարված ամերիկյան կապիտալին: