ԵՐԵՎԱՆ, 13 դեկտեմբերի – Sputnik. ՀՀ Շիրակի մարզպետ Մուշեղ Մուրադյանը Ադրբեջանից հայ գերիների վերադարձի մասին կառավարության պաշտոնական հաղորդագրությունից է տեղեկացել։ Այս մասին «Մուրացան» զինվորական հոսպիտալ ժամանած Մուրադյանն ասաց լրագրողների հետ զրույցում։
Նշենք, որ ներկա պահին հայ գերիների ծնողներն ու հարազատները հավաքվել են հոսպիտալի մոտ` դիմավորելու իրենց որդիներին, ամուսիններին ու եղբայրներին։
«Գերիների վերադարձի մասին տեղեկացվել ենք, երբ կառավարությունը պաշտոնական հրապարակում արեց։ Նշեմ նաև, որ մշտապես բանակցություններ են տարվել ու դրանք գաղտնի են եղել, քանի որ ծանր ժամանակահատված էր»,– ասաց Շիրակի մարզպետը։
Հարցին` ինչպես է որոշվել, թե որ գերիներն են գալու, Մուրադյանը շեշտեց` բանակցությունների գործընթացը փակ է եղել, մանրամասներ չի կարող ասել։
Հիշեցնենք` դեկտեմբերի 7-ին Հայաստանի Հանրապետության վարչապետի աշխատակազմն ու Ադրբեջանի Հանրապետության նախագահի վարչակազմը համատեղ հայտարարություն տարածեցին, որում ասվում էր` Ադրբեջանի Հանրապետությունն ազատ է արձակում 32 հայ զինծառայողի, Հայաստանն էլ իր հերթին ազատ է արձակում դատապարտված 2 ադրբեջանցի զինծառայողի։ Ռազմագերիների փոխանակումը տեղի է ունեցել այսօր Ղազախ–Իջևան սահմանին։ Հայաստան վերադարձած գերիների անունները հրապարակել է ՀՀ վարչապետ Նիկոլ Փաշինյանը։