ԵՐԵՎԱՆ, 9 դեկտեմբերի – Sputnik. Չինաստանից արտահանման աճի նշանները խթանում են պղնձի համաշխարհային գները։
2022 թվականի նոյեմբերի համեմատ այն տարվա նոյեմբերին Չինաստանից արտահանումն աճել է 0,5%-ով՝ կազմելով 291,9 մլրդ դոլար։ 12 ամսվա կտրվածքով նման աճ առաջին անգամ նկատվում է ապրիլից, նշում է Nasdaq-ը։
Արտադրության և արտահանման աճի պատճառով չինական գործարանները սկսել են ավելի շատ մետաղ ձեռք բերել, մասնավորապես Չինաստան պղնձի ներկրումը հոկտեմբերի համեմատ աճել է 10%-ով՝ երկու տարվա ընթացքում մինչև ռեկորդային մակարդակ։
Արդյունքում, Լոնդոնյան բորսայում պղնձի գնանշումներն աճել են մոտ 0,5%–ով՝ շուրջ 8,380 դոլար մեկ տոննայի դիմաց։
Այնուամենայնիվ, կա այլ գործոն, որը դեռ պղնձի գները ներքև է քաշում՝ դոլարի ուժեղ փոխարժեքը։ Քանի որ պղինձը հաշվարկվում է դոլարով (ինչպես և բորսայական մյուս ապրանքները), որքան դոլարն ավելի թանկ է, այնքան ավելի թանկ է արժենում պղնձի գնումը այլ արժույթներ ունեցողներ համար (Հնդկաստանում, Չինաստանում և այլն)։ Դա սահմանափակում է պղնձի պահանջարկը։
Նշենք, որ դոլարի փոխարժեքը սկսեց աճել, երբ դեկտեմբերի սկզբին հրապարակվեցին գնաճի նվազման մասին տվյալները։ Այդ իսկ պատճառով ֆինանսական շուկայի մասնակիցները կարծում են, որ ԱՄՆ Դաշնային պահուստը, ամենայն հավանականությամբ, կդադարի բարձրացնել առանցքային տոկոսադրույքը, ոմանք էլ նույնիսկ դրա նվազում են ակնկալում հաջորդ տարվա կեսերին։
Հավելենք` պղնձի խտանյութը (մաքուր պղնձի կիսաֆաբրիկատ) հայկական արտահանման խոշորագույն հոդվածներից մեկն է շարունակում մնալ։ Երկար ժամանակ այն խոշորագույնն էր ծավալով, սակայն այս տարվա առաջին կիսամյակում առաջ անցավ ավտոմեքենաների արտահանումը (միջնորդական առևտրի շրջանակում) և դորեի ձուլվածքը (մաքուր ոսկու կիսաֆաբրիկատ, որը ստացվում է հայկական հանքավայրերում և որի արդյունահանումը, չնայած մի շարք դժվարություններին շարունակվում է)։ Այնուամենայնիվ, Հայաստանից պղնձի խտանյութի արտահանման ծավալը շարունակում է զգալի մնալ և 2023 թվականի առաջին կիսամյակում կազմել է մոտ 230 մլն դոլար։ Դրանից շուրջ 180 մլն դոլարը Չինաստանն է ձեռք բերել։