Մամուռն ամրացնում է Չինական մեծ պատը․ գիտնականների բացահայտումը

ԵՐԵՎԱՆ, 9 դեկտեմբերի - Sputnik. Հավանաբար Չինական մեծ պատը չի քայքայվում վրան աճած միկրոորգանիզմներից բաղկացած պաշտպանիչ շերտի հաշվին։ Նման ենթադրություն են արել չինացի գիտնականները, որոնք ուսումնասիրել են պատի առանձին հատվածները։ Նրանց ուսումնասիրությունը հրապարակվել է Science Advances ամսագրում։

Պատի կառուցումը սկսվել է մ․թ․ա․ III դարում կայսրության հյուսիսային սահմանների պաշտպանության համար և տևել մի քանի դար։ Երկարությունն ավելի քան 20 հազար կմ է։ Մենք սովոր ենք պատկերացնել Չինական մեծ պատը Պեկինից քիչ հեռու գտնվող նրա ամենահայտնի հատվածներով։ Դրանք արված են քարից և աղյուսից։ Սակայն պատի զգալի հատվածը կավից է, սեղմված հողի և և մանրախիճի խառնուրդից։

Այդ նյութերն ինքնին, իհարկե, շատ ավելի արագ են քայքայվում, քան քարը։ Սակայն վրան բնական շերտ է հայտնվում, որը պաշտպանում է պատը տեղումներից և հողմահարությունից։ Այդ շերտի բաղկացուցիչ մասը ցիանոբակտերիաներն (որոնք ֆոտոսինթեզի են ենթարկվում) են և մամուռը։ Դրանք պոլիմերային նյութեր են արտադրում, որոնք հողի մասնիկները կապում են միմյանց` ըստ էության ցեմենտի վերածելով այն։ Նման հատկանիշներով հատկապես առանձնանում է մամուռը։

Գիտնականները համեմատել են տարբեր ժամանակներում կառուցած պատի տարբեր հատվածներից ստացված նմուշները վրայի առաջացած բնական շերտով և առանց դրա։ Պարզվել է, որ առաջին դեպքում նմուշները մինչև երեք անգամ ավելի ամուր են։