ԵՐԵՎԱՆ, 7 դեկտեմբերի – Sputnik. ՀՀ ԱԺ նախագահ Ալեն Սիմոնյանին մտահոգում է հարցը, թե ինչու են ՌԴ–ի քննադատությունները միշտ հնչում Հայաստանի, այլ ոչ թե Ադրբեջանի հասցեին։ Այս մասին նա հայտարարեց այսօր ԱԺ–ում լրագրողների հետ զրույցում։
ԱԺ նախագահի խոսքով` Ադրբեջանն ինչ ուզել` մեր տարածաշրջանում արել է, ու Ռուսաստանը կա՛մ չի կարողացել, կա՛մ չի ուզել արձագանքել դրան։
«Հիշո՞ւմ եք՝ ինչ աղմուկ բարձրացրեց ռուսական կողմը, երբ Հայաստանը հումանիտար օգնություն ուղարկեց Ուկրաինա, երբ մի քանի տարի էր` պատերազմ էր: Այնինչ Ադրբեջանը բազմաթիվ անգամ նման օգնություն է ուղարկել, բայց ոչ մի ծպտուն Ռուսաստանի «արդարացի» ԱԳՆ-ից մենք չլսեցինք», - ասաց Սիմոնյանը:
Ռուսաստանը, ըստ Ալեն Սիմոնյանի, շատ ցավոտ է արձագանքում Հայաստանի պարագայում, իսկ Ադրբեջանի պարագայում` ոչ։
«Իմ կարծիքով` կա՛մ չի կարողանում, կա՛մ էլ ձև է անում, որ չի նկատում, որպեսզի իր լավ դեմքը պահպանի վատ խաղի ժամանակ»,– ասաց նա։
Հիշեցնենք` սեպտեմբերի 8–ին Ռուսաստանում Հայաստանի Հանրապետության դեսպան Վաղարշակ Հարությունյանը կանչվել էր ՌԴ ԱԳՆ։ ՌԴ-ն իր կոշտ դիրքորոշումն ու բողոքի նոտան էր հայտնել Հայաստանին։
Հայտարարության մեջ ասվում էր, որ Հայաստանի ղեկավարությունը վերջին շրջանում մի շարք ոչ բարեկամական քայլեր է ձեռնարկել ՌԴ-ի նկատմամբ։
Առաջինը միջազգային քրեական դատարանի Հռոմի կանոնադրության (Հռոմի ստատուտ) վավերացման գործընթացի մեկնարկն է, երկրորդը` ՀՀ վարչապետի կնոջ` Աննա Հակոբյանի այցը Կիև, ինչպես նաև մարդասիրական օգնության փոխանցումը Կիևին, և երրորդը` ՀՀ տարածքում ԱՄՆ-ի մասնակցությամբ զորավարժությունների անցկացումը։