ԵՐԵՎԱՆ, 7 դեկտեմբերի - Sputnik. Ադրբեջանական լրատվամիջոցները հայտնում են, թե ովքեր են գերությունից ազատված 32 հայ զինծառայողները։
Քիչ առաջ հայտնի դարձավ, որ Ադրբեջանի Հանրապետությունն ազատ է արձակում 32 հայ զինծառայողների, Հայաստանն էլ իր հերթին ազատ է արձակում 2 ադրբեջանցի զինծառայողներին։
«Հայաստան տեղափոխված 32 անձանցից 26-ը ձերբակալվել են 2020 թվականի դեկտեմբերին Հադրութի շրջանում, իսկ մնացած 6-ը տարբեր ժամանակներում բերման են ենթարկվել սահմանին։Այս բոլոր մարդիկ արդեն կրել են իրենց պատժի մեծ մասը»,–գրում են ադրբեջանական լրատվամիջոցները։
Ցուցակում ներգրավված չեն Արցախի բարձրաստիճան պաշտոնյաներ Արայիկ Հարությունյանը, Բակո Սահակյանը, Արկադի Ղուկասյանը, Ռուբեն Վարդանյանը, ինչպես նաև Վագիֆ Խաչատուրյանը, Ալյոշա Խոսրովյանը։
Ադրբեջանական լրատվամիջոցները նաև հայտնում են, որ համաձայնությունը ձեռք է բերվել Ադրբեջանի նախագահի աշխատակազմի և ՀՀ վարչապետի աշխատակազմի միջև ուղիղ բանակցությունների արդյունքում և առանց երրորդ երկրի միջնորդության։
«Սա ևս մեկ անգամ ցույց է տալիս, որ Ադրբեջանն ու Հայաստանը կարող են առաջ տանել խաղաղ գործընթացը առանց միջնորդների»,–գրում են լրատվամիջոցները։
Հիշեցնենք` ՄԻԵԴ-ում հայ ռազմագերիների շահերի ներկայացուցիչ, իրավապաշտպան Սիրանուշ Սահակյանը նոյեմբերի 30–ին հայտնել էր, որ Բաքվում պաշտոնապես 55 հայ է պահվում, այդ թվում 6 քաղաքացիական գերի, 41 ռազմագերի և 8 նախկին բարձրաստիճան քաղաքական գործիչ, որոնք համարվում են քաղբանտարկյալներ։ Սրանից զատ ադրբեջանական կողմը գերեվարվել է առնվազն 80 անձանց (ռազմագերիներ և քաղաքացիական անձինք)։