ԵՐԵՎԱՆ, 6 դեկտեմբերի - Sputnik. Կիպրական ընկերության կողմից «ՄՏՍ Հայաստանի» ձեռքբերմանը նախկինում տրված բացասական եզրակացությունը դրական դարձավ, որովհետև եղած մտահոգությունները փարատվեցին։ Ազգային ժողովում կառավարության հետ հարցուպատասխանի ժամանակ այս մասին հայտարարեց ՀՀ վարչապետ Նիկոլ Փաշինյանը՝ պատասխանելով «Քաղաքացիական պայմանագիր» խմբակցության պատգամավոր Արսեն Թորոսյանի հարցին։ Թորոսյանը, մասնավորապես, մտահոգություն հայտնեց, որ խոսքը վերաբերում է բաժանորդների ամենամեծ թիվ ունեցող օպերատորին, և սա նաև ազգային անվտանգության հարց է։
«6 ամիս առաջ տրվել է բացասական եզրակացություն, որովհետև ուսումնասիրությունները մտահոգություններ են ի հայտ բերել, որոնք հետագայում ընկերության կողմից ներկայացված լրացուցիչ փաստերի ու փաստարկների ուսումնասիրության արդյունքում փարատվել են, և այդ պատճառով բացասական եզրակացությունը դարձել է դրական»,- ասաց Փաշինյանը։
Թորոսյանը նկատեց, որ հավելյալ հարցերի տեղիք է տալիս նաև այն հանգամանքը, որ «ՄՏՍ Հայաստանը» ձեռք բերած «Ֆեդիլքո Գրուպ Լիմիրիդ» ընկերությունը հայտնի չէ կապի և հաղորդակցության ոլորտում։ Դրան ի պատասխան վարչապետը շեշտեց՝ խոր ուսումնասիրություններ են արվել։
«Մտահոգությունները կամ հնարավոր ռիսկերն առաջինը ՀՀ կառավարությունն է տեսնում և ձևակերպում, դրանք ուսումնասիրության արդյունքում կա՛մ հերքվում են, կա՛մ փարատվում, արդյունքում կայացվում է համապատասխան որոշում»,- ասաց Փաշինյանը։
Հիշեցնենք, որ 2023 թ. ապրիլին ՀՀ մրցակցության պաշտպանության հանձնաժողովն արգելել էր «Ֆեդիլքո Գրուպ Լիմիթիդ» ընկերությանը ձեռք բերել «ՄՏՍ Հայաստան» ՓԲԸ–ի բաժնետոմսերը: Գործարքի դեմ էր հանդես եկել նաև ՀՀ հանրային ծառայությունները կարգավորող հանձնաժողովը` նշելով, որ գործարքը վնասում է կամ կարող է վնասել ՀՀ պետական շահերը ու ազգային անվտանգությունը։
Նոյեմբերի 11–ին, սակայն, հայտնի դարձավ, որ «ՄՏՍ Հայաստան» ՓԲԸ–ն կվաճառվի կիպրական «Ֆեդիլքո Գրուպ Լիմիրիդ» ընկերությանը։ Նոյեմբերի 15–ին Հանրային ծառայությունները կարգավորող հանձնաժողովը հավանություն տվեց «ՄՏՍ Հայաստանի» 100% բաժնեմասի վաճառքին։