ԵՐԵՎԱՆ, 2 դեկտեմբերի – Sputnik. ՀՀ ոստիկանությունը բերման ենթարկեց «Զանգ» շարժման մի քանի ակտիվիստների, որոնք Երևանի կենտրոնում ակցիա էին իրականացնում` պահանջելով ՀՀ վարչապետ Նիկոլ Փաշինյանի հրաժարականը։
«Զանգ» նախաձեռնության անդամները երթի էին դուրս եկել ճամփորդական վրանով։ Նրանք քայլում էին Երևանի կենտրոնով ու անընդհատ զանգ հնչեցնում։
Ակտիվիստները նաև պաստառներ էին բերել, որոնց վրա գրված էր` «Ահազանգ», «Վրան դիր, որոշիր ապագադ», «Դու Նիկոլ չես, վրան դիր», «Զանգ կախիր, վրան պահիր, որոշիր»։
Երթն ավարտվեց Մաշտոցի պուրակում, որտեղ նախաձեռնության անդամները հայտարարեցին, որ պատրաստվում են վրան տեղադրել։ Ոստիկանությունը, որն ամբողջ ընթացքում ուղեկցում էր նրանց, դեմ էր այդ որոշմանը և 15 րոպե ժամանակ տվեց, որ դադարեցնեն վրանի տեղադրումը։ Փոխարենը ակցիայի մասնակիցները շղթա կազմեցին վրանի շուրջը։
Իրավապահները սկսեցին բերման ենթարկել նրանց։ Ըստ նախաձեռնության անդամների` բերման է ենթարկվել 14 ակտիվիստ։