ԵՐԵՎԱՆ, 1 դեկտեմբերի – Sputnik. «Fly Arna» ազգային ավիափոխադրող ընկերությունը լրացուցիչ ֆինանսավորման կարիք ունի։ Sputnik Արմենիայի հետ զրույցում այս հայտարարությունն արեց ՀՀ էկոնոմիկայի նախարար Վահան Քերոբյանը։
«Ժողովուրդ» օրաթերթն այսօր գրել էր, որ ընկերությունը շուտով Հայաստանից չվերթեր չի իրականացի, այս մասին որոշումը կայացվելու է դեկտեմբերի 2-4-ն ընկած ժամանակահատվածում։
«Նման ինֆորմացիա չեմ լսել։ Ես գիտեմ, որ ընկերությունը լրացուցիչ ֆինանսավորման կարիք ունի, և այդ հարցը քննարկվում է։ Կարծում եմ` լուծումներ կտրվեն։ Մենք աշխատում ենք ընկերության հետ»,– ասաց Քերոբյանը։
Հարցին, թե ինչ լուծումների մասին է խոսքը, նախարարը պատասխանեց` այս պահին չի ցանկանում խոսել այդ մասին։
Հիշեցնենք` ընկերությունը 2021 թվականի դեկտեմբերի 10-ին պետական գրանցում է ստացել «Հայկական ազգային ավիաուղիներ» ՓԲԸ-ից և ներկայանում է «Ֆլայ Արնա» ապրանքանիշով։ Համաձայն պետռեգիստրի՝ ավիաընկերությունն ունի 3 բաժնետեր, բայց ներկայանում է որպես ազգային փոխադրող: