ԵՐԵՎԱՆ, 1 դեկտեմբերի – Sputnik. 44-օրյա պատերազմի հանգամանքներն ուսումնասիրող ԱԺ քննիչ հանձնաժողովը առաջիկա 1.5– 2 ամսվա ընթացքում կկազմի զեկույց և կներկայացնի ՀՀ ազգային ժողովին։ Այս մասին Sputnik Արմենիայի հետ զրույցում ասաց հանձնաժողովի անդամ և «Քաղաքացիական պայմանագիր» խմբակցության պատգամավոր Քրիստինե Պողոսյանը՝ մեկնաբանելով քննիչ հանձնաժողովի գործունեության ավարտն ու առաջիկա անելիքները։
Նշենք, որ քննիչ հանձնաժողովի լիազորությունների ժամկետը լրանում է դեկտեմբերի 3-ին։
Պողոսյանի խոսքով՝ հանձնաժողովի աշխատանքը տևել է 1,5 տարուց մի փոքր ավելի։ Հանձնաժողովը 3 անգամ դիմել է Ազգային ժողով՝ գործունեության ժամկետը երկարաձգելու խնդրանքով։
«Աշխատանքների ավարտից հետո հանձնաժողովը պետք է ամփոփիչ զեկույց հրապարակի՝ ներկայացնելով իր եզրակացությունը և պատերազմի հանգամանքների ուսումնասիրության արդյունքները: Զեկույցում կներառվի հարցաքննված անձանց խոսքի վրա հիմնված եզրակացությունները, փաստերը, քարտեզները։ Այն ամենը, ինչ մեզ տրամադրվել է պաշտպանության նախարարության կողմից, բարձրաստիճան պաշտոնյաների կողմից։ Այդ ամենն իմի կբերվի և զեկույցի տեսքով կներկայացվի»,–ասաց Պողոսյանը։
Նա ընդգծեց, որ զեկույցից հետո քննարկում չի նախատեսվում, բայց բոլոր այն պատգամավորները, որոնք ունեն գաղտնի նյութերին ծանոթանալու թույլտվություն, կկարողանան զեկույցին ծանոթանալ։
«Եթե կլինեն գաղտնի մասեր, դրանք կհանձնվեն ԱԱԾ–ին, եթե կլինի մաս, որ հնարավոր կլինի հրապարակայնացնել, այդպես էլ կարվի ԱԺ ամբիոնից»,- նշեց Պողոսյանը։
Միևնույն ժամանակ, նրա խոսքով, հանձնաժողովի ողջ աշխատանքով հաստատվել են նախկինում իրեն հայտնի բոլոր տեղեկությունները։
«Ես չգիտեմ, թե որքանով դա հնարավոր կլինի բաց ներկայացնել, բայց կարծում եմ՝ հարցերը սպառիչ պատասխաններ են ստացել»,- ասաց Պողոսյանը։
Միաժամանակ պատգամավորը նշեց, որ եթե հնարավորություն լիներ հանձնաժողովի աշխատանքը երկարաձգել ևս 6 ամսով, արժեր դա անել, քանի որ դեռ կան մարդիկ, որոնց կարելի էր լսել։