ԵՐԵՎԱՆ, 30 նոյեմբերի – Sputnik. Արցախից բռնի տեղահանված մի շարք քաղաքացիներ մինչ օրս չեն կարողանում օգտվել ՀՀ կառավարության կողմից տրամադրվող աջակցության ծրագրերից։ Այդպիսի իրավիճակում հայտնված քաղաքացիներից մեկն էլ Իջևանում բնակվող 30-ամյա Մերի Ջավադյանն է։ Կինն ու նրա 4 անչափահաս երեխաները մինչ օրս չեն կարողանում օգտվել ինչպես 100 000 դրամ աջակցությունից, այնպես էլ 40 000 + 10 000 աջակցության ծրագրից։ Նա փորձել է պարզաբանում ստանալ ՀՀ աշխատանքի և սոցիալական հարցերի նախարարության միասնական սոցիալական ծառայությունից, սակայն հստակ պատասխան չի ստացել։
Մերի Ջավադյանն իր խնդրի մասին պատմեց Sputnik Արմենիային, ու քանի որ նմանատիպ տասնյակ ահազանգեր կան նաև սոցցանցերում, մենք դիմեցինք ՀՀ աշխատանքի և սոցիալական հարցերի նախարարություն։
Գերատեսչության տեղեկատվության և հասարակայնության հետ կապերի բաժնից նշեցին, որ 100 000 դրամ աջակցության ծրագրից օգտվելու համար դիմումների վերջնաժամկետը դեկտեմբերի 1–ին է, և միայն դրանից հետո կամփոփվեն բոլոր տվյալները։
«Այն դիմումները, որոնք գտնվում են մշակման, տվյալների նույնականացման փուլում, որի հետևանքով մարդիկ դեռ աջակցություն չեն ստացել, պետք է ամփոփվեն և ուղարկվեն վճարման։ Եթե վերջնական վճարումից հետո կլինեն դիմումներ, որոնք չեն բավարարվել, այդ խնդիրները վեր կհանվեն, կապ կհաստատվի տվյալ շահառուների հետ, որից հետո հանդես կգանք պարզաբանմամբ»,– հայտնեցին նախարարությունից։
Հավելենք, որ վերջին տվյալներով` 100 հազար դրամ միանվագ աջակցության ծրագրից օգտվել է 108 336 անձ։
Ինչ վերաբերում է 40+10 հազար ծրագրին, ապա հոկտեմբերին ավտոմատ կերպով ծրագրից օգտվել են 99 820 շահառուներ։ Ինչ վերաբերում է նոյեմբերի վճարումներին, ապա նախարարությունը ստացել է 85 095 դիմում։