ԵՐԵՎԱՆ, 30 նոյեմբերի – Sputnik. Հայաստանը պետք է դիվերսիֆիկացնի իր անվտանգությունը և կախված չլինի մեկ կենտրոնից։ Այս մասին Դուբայում Արաբական Միացյալ Էմիրությունների հայ համայնքի ներկայացուցիչների հետ հանդիպմանն ասել է ՀՀ նախագահ Վահագն Խաչատուրյանը, գրում է «Արմենպրեսը»։
Վահագն Խաչատուրյանը հանդիպմանն անդրադարձել է Հայաստանի առջև ծառացած անվտանգային մարտահրավերներին։
«Անվտանգության առումով Հայաստանը խնդիրներ ունի, քանի որ անվտանգային այն համակարգը, որում երկիրը երկար տարիներ եղել է, չի աշխատել, ինչի հետևանքով էլ երկիրը լուրջ խնդիրների է բախվում»,-ասել է նախագահը։
Նախագահը կարևորել է հարևան երկրների հետ հարաբերությունների կարգավորումը՝ նշելով, որ հարևան երկրների հետ խաղաղ ու համերաշխ ապրելուն, բարիդրացիական հարաբերություններին այլընտրանք չկա։
Նախագահը ներկայացրել է Հայաստանի և Ադրբեջանի միջև խաղաղության պայմանագրի շուրջ բանակցային գործընթացի զարգացումները՝ շեշտելով, որ այդ գործընթացում հնարավոր չի լինում առաջընթաց գրանցել Ադրբեջանի ապակառուցողական դիրքորոշումների պատճառով։ ՀՀ նախագահն ընդգծեց, որ Հայաստանն այս գործընթացում կառուցողական է տրամադրված, իսկ Ադրբեջանը վերջին շրջանում խուսափում է բանակցություններից։
Վահագն Խաչատուրյանն ընդգծել է, որ շատ կարևոր է, որպեսզի Հայաստանում մեկնարկած ժողովրդավարական բարեփոխումները լինեն շարունակական։
Նրա խոսքով՝ Հայաստանն այդ պրիզմայով պետք է ներկայանա աշխարհին, քանի որ ժողովրդավարությունը նպաստում է տարբեր երկրների հետ հարաբերությունները զարգացնելուն։
Հայաստանի Հանրապետության նախագահ Վահագն Խաչատուրյանն աշխատանքային այցով մեկնել է Արաբական Միացյալ Էմիրություններ՝ մասնակցելու ՄԱԿ-ի Կլիմայի փոփոխության մասին շրջանակային կոնվենցիայի կողմերի 28-րդ համաժողովին (COP28)։