ԵՐԵՎԱՆ, 30 նոյեմբերի – Sputnik. Այս պահին Բաքվում պաշտոնապես 55 հայ է պահվում։ Ասուլիսում այս տվյալը ներկայացրեց ՄԻԵԴ-ում հայ ռազմագերիների շահերի ներկայացուցիչ, իրավապաշտպան Սիրանուշ Սահակյանը։
«Ունենք 6 քաղաքացիական գերի, 41 ռազմագերի և 8 նախկին բարձրաստիճան քաղաքական գործիչ, որոնք համարվում են քաղբանտարկյալներ։ Սրանից զատ ադրբեջանական կողմը գերեվարվել է առնվազն 80 անձանց (ռազմագերիներ և քաղաքացիական անձինք), որոնց ճակատագիրը պարզելու ուղղությամբ քայլեր չեն իրականացվում»,– ասաց Սահակյանը։
Իրավապաշտպանի խոսքով` այս ամբողջ ժամանակահատվածում գերիները չեն կարողացել հանդիպումներ ունենալ խոշտանգումների կանխարգելման որևէ անկախ կառույցի հետ։
«Այցելությունները եղել են բացառապես ԿԽՄԿ-ի կողմից, բայց այդ այցելությունները շատ դեպքերում ուշացած են։ Անգամ բարձրաստիճան պաշտոնյաների դեպքում մենք 2-3 շաբաթ անց կարողացանք տեղեկություն ստանալ առաջին այցելության մասին»,- նշեց Սահակյանը։
Նա ընդգծեց, որ հայրենիք վերադարձած բոլոր ռազմագերիները և քաղաքացիական անձինք պատմել են գերեվարման ընթացքում վատ վերաբերմունքի և խոշտանգումների մասին։
«Մենք կարծում ենք, որ խոշտանգումները կանխող մեխանիզմներ Ադրբեջանում չկան, և միջազգային այցելությունների բացակայության պահմաններում այս անձինք շարունակում են ենթարկվել խոշտանգումների, անմարդկային և վատ վերաբերմունքի»,– ասաց Սահակյանը։
Ավելի վաղ ՀՀ ԱԳ փոխնախարար Վահան Կոստանյանը հայտարարել էր, որ Երևանը օգտագործում է իր ողջ գործիքակազմը, որպեսզի Ադրբեջանում ապօրինաբար պահվող հայերը, այդ թվում՝ նախկին պաշտոնյաները, օր առաջ վերադառնան Հայաստան։ ՀՀ վարչապետ Նիկոլ Փաշինյանն էլ ուղիղ եթերում պատասխանելով քաղաքացիների հարցերին` նշել էր, որ Երևանը պատրաստ է Հայաստանում դատապարտված ադրբեջանցիներին փոխանակել հայ գերիների հետ։