ԵՐԵՎԱՆ, 29 նոյեմբերի – Sputnik. ՀՀ արտգործնախարար Արարատ Միրզոյանը տարածաշրջանային անվտանգությանն առնչվող հարցեր է քննարկել Նիդեռլանդների Թագավորության ԱԳ նախարար Հանկը Բրուինս Սլոթի հետ։ Տեղեկությունը հայտնում է ՀՀ արտգործնախարարությունը։
Հանդիպումը կայացել է Սկոպյեում ԵԱՀԿ նախարարական 30-րդ համաժողովի շրջանակում։
Զրուցակիցներն արձանագրել են, որ երկու երկրների միջև զարգանում է ակտիվ քաղաքական երկխոսություն և պատրաստակամություն հայտնել համատեղ քայլեր ձեռնարկել երկկողմ օրակարգը նոր ուղղություններով ընդլայնելու նպատակով։
Քննարկվել են ՀՀ-ԵՄ համապարփակ գործընկերության օրակարգին առնչվող հարցեր՝ գոհունակությամբ նշելով փոխգործակցության զարգացման դինամիկան։
«Հանդիպման ընթացքում մտքեր են փոխանակվել նաև տարածաշրջանային անվտանգությանն առնչվող հարցերի, ինչպես նաև Հարավային Կովկասում հարատև կայունության հաստատման ուղղությամբ իրականացվող քայլերի շուրջ։ Այս համատեքստում Արարատ Միրզոյանն իր գործընկերոջն է ներկայացրել ՀՀ տեսլականը, որն ընդգրկում է նաև ՀՀ կառավարության կողմից մշակված «Խաղաղության խաչմերուկ» նախագիծը»,– ասված է հաղորդագրությունում:
Անդրադարձ է կատարվել Ադրբեջանի կողմից Լեռնային Ղարաբաղում էթնիկ զտման հետևանքով բռնի տեղահանված հայերի կարիքների և իրավունքների հասցեագրմանն առնչվող հարցերի։
Հիշեցնենք` Միրզոյանը Հյուսիսային Մակեդոնիա է մեկնել աշխատանքային այցով։ Նախարարն այնտեղ կլինի մինչև դեկտեմբերի 1-ը։