ԵՐԵՎԱՆ, 29 նոյեմբերի - Sputnik. Եգիպտոսի, Իսրայելի, Կատարի և ԱՄՆ-ի ներկայացուցիչներն աշխատում են Իսրայելում և Գազայի հատվածում ռազմական գործողությունների դադարը երկարացնելու ուղղությամբ և հույս ունեն, որ հրադադարը կշարունակվի նաև վաղը: Այս մասին հայտնում է CNN-ը` հղում անելով իր աղբյուրին:
Աղբյուրի տվյալներով` չորս երկրների ներկայացուցիչները Դոհայում կայացած հանդիպման ժամանակ եկել են այն եզրակացության, որ գրոհայինները «կկարողանան պատանդների լրացուցիչ ցուցակ տրամադրել» նոյեմբերի 30–ին, եթե փոխանակման գործընթացն ընթանա ձեռք բերված պայմանավորվածությունների համաձայն և ՀԱՄԱՍ-ն ազատ արձակի առնվազն 10 իսրայելցիների:
Ռազմական գործողությունների դադարն այդկերպ հնարավոր կլինի մեկ օրով երկարացնել։
Ներկայում Կատարում են գտնվում ԿՀՎ տնօրեն Ուիլյամ Բերնսը, իսրայելական հետախուզության` «Մոսադի» ղեկավար Դավիթ Բարնեան և Կատարի ներկայացուցիչները, որոնք սերտ կապեր են պահպանում ՀԱՄԱՍ-ի քաղաքական ղեկավարության հետ:
Ներկայում Կատարում են գտնվում ԿՀՎ տնօրեն Ուիլյամ Բերնսը, իսրայելական հետախուզության` «Մոսադի» ղեկավար Դավիթ Բարնեան և Կատարի ներկայացուցիչները, որոնք սերտ կապեր են պահպանում ՀԱՄԱՍ-ի քաղաքական ղեկավարության հետ:
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։
Հոկտեմբերի 27–ի երեկոյան իսրայելական ուժերը մտել են Գազայի հատված։ Իսրայելն ավիահարվածներ է հասցնում օդից, ծովից և ցամաքից։
Իսրայելը և Գազայի հատվածում իշխող պաղեստինյան ՀԱՄԱՍ շարժումը Կատարի միջնորդությամբ նոյեմբերի 22-ին ձեռք են բերել հակամարտության սրումից ի վեր առաջին մասշտաբային պայմանավորվածությունը. կողմերը համաձայնել են չորս օրով դադարեցնել ռազմական գործողությունները` միմյանց մոտ գտնվող տասնյակ պատանդների և ձերբակալվածների փոխանակման համար: Ավելի ուշ հրադադարը երկարաձգվեց մինչև նոյեմբերի 30-ը։