ԵՐԵՎԱՆ, 26 նոյեմբերի – Sputnik. Չինաստանի իշխանությունը քննարկում է շինարարության ոլորտի աջակցության նոր միջոցը՝ բանկերին թույլ տալ վարկավորել շինարարական ընկերություններին առանց գրավի (50 ընկերությունների ցանկից): Ինչպես ասված է JP Morgan բանկի հայտարարության մեջ, այս քայլը հղի է երկրի ֆինանսական համակարգի անկայունության ռիսկով:
Սա շինարարության ոլորտին աջակցության առաջին ծրագիրը չէ ճգնաժամային իրավիճակից հետո, որում հայտնվել է չինական անշարժ գույքի շուկան Evergrande-ի պարտքերի և այլ խոշոր կառուցապատողների պատճառով (նրանց պարտքերը հասնում են Չինաստանի ՀՆԱ-ի մոտ 12%-ին)։ Ավելի վաղ իշխանությունը բացել էր 200 մլրդ յուան (մոտ 28 մլրդ դոլար) վարկային հիմնադրամ անավարտ շինարարական օբյեկտներն ավարտին հասցնելու համար:
Առայժմ, ըստ Nomura վերլուծաբանների չինական ֆինանսական կորպորացիայի, երկրում կա մոտ 20 մլն կիսակառույց բնակարան։ Եթե չապահովված վարկերը սկսեն տրամադրվել դրանց ավարտի համար, ապա շինարարության վերսկսված տեմպերը կմեծացնեն պղնձի պահանջարկը (ՉԺՀ-ն սպառում է պղնձի համաշխարհային շուկայի մոտ կեսը)։
Նշենք, որ պղնձի խտանյութը (մաքուր պղնձի կիսաֆաբրիկատ) հայկական արտահանման խոշորագույն ապրանքներից է։ Երկար ժամանակ այն ծավալով խոշորագույնն էր, սակայն այս տարվա առաջին կիսամյակում առաջ եկավ ավտոմեքենաների արտահանումը (միջնորդական առևտրի շրջանակում) ու դորեի համաձուլվածքը (մաքուր ոսկու կիսաֆաբրիկատ, հայկական հանքերից, որոնց արդյունահանումը, չնայած մի շարք դժվարություններին, շարունակվում է)։ Այնուամենայնիվ, Հայաստանից պղնձի խտանյութի արտահանման ծավալը զգալի է և 2023-ի առաջին կիսամյակում պետականորեն կազմել է մոտ 230 մլն դոլար, որից մոտ 180 մլն դոլարը գնել է Չինաստանը։
Նշենք, որ մեկ այլ միջոց, որը կարող է աջակցել պղնձի համաշխարհային շուկային, էլեկտրամոբիլների գնման համար Չինաստանում պետական արտոնություններն են: Հունիսին ՉԺՀ-ի Պետխորհուրդը հայտարարել էր, որ դրանք որոշ մոդելների համար երկարաձգվել են մինչև չորս տարի ժամկետով։