ԵՐԵՎԱՆ, 25 նոյեմբերի – Sputnik. Հայաստանի Հանրապետության և Սաուդյան Արաբիայի Թագավորության միջև հաստատվել են դիվանագիտական հարաբերություններ։ Տեղեկությունը հայտնում է ՀՀ ԱԳՆ մամուլի ծառայությունը։
«Նոյեմբերի 24-ին Հայաստանի Հանրապետության և Սաուդյան Արաբիայի Թագավորության միջև ստորագրվել է դիվանագիտական հարաբերություններ հաստատելու մասին արձանագրություն»,–նշված է հաղորդագրության մեջ:
Արձանագրությունը ստորագրվել է Աբու Դաբիում՝ ԱՄԷ-ում Հայաստանի Հանրապետության դեսպան Կարեն Գրիգորյանի և Սաուդյան Արաբիայի Թագավորության դեսպան Սուլթան բին Աբդալլահ Ալ-Լուայհան Ալ-Անկարի կողմից:
Հիշեցնենք` նոյեմբերի 24–ին ՀՀ վարչապետ Նիկոլ Փաշինյանը ուղիղ եթերում պատասխանելով ՀՀ քաղաքացիների և սփյուռքի հայրենակիցների հարցերին` նշել էր, որ առաջիկայում Հայաստանն ու Սաուդյան Արաբիան դիվանագիտական հարաբերություններ կհաստատեն։ Նա հավելել էր, որ Սաուդյան Արաբիայի հետ վերջին տարիներին շփումներ եղել են, ԱԳ նախարարները մի քանի անգամ հանդիպել են։