ԵՐԵՎԱՆ, 23 նոյեմբերի – Sputnik. Բելառուսի նախագահ Ալեքսանդր Լուկաշենկոն Հայաստանի ղեկավարությանը կոչ է արել խնդրահարույց հարցերը լուծել բանակցություններով, ոչ թե դեմարշներով: Նա այդ մասին ասել է` մեկնաբանելով ՀԱՊԿ գագաթնաժողովում Հայաստանի ղեկավարության և մասնավորապես վարչապետ Նիկոլ Փաշինյանի բացակայությունը:
Բելառուսի նախագահի խոսքով՝ Մինսկում կայացած գագաթնաժողովի մասնակիցները քննարկել են նաև Կովկասում սիրող իրավիճակը և Հավաքական անվտանգության խորհրդի անդամներից մեկի որոշ դժգոհությունները:
«Մենք եզրահանգեցինք, որ խնդրահարույց հարցեր միշտ են եղել և կլինեն։ Եթե մենք մտադիր ենք լուծել դրանք, ապա պետք է նստել բանակցությունների սեղանի շուրջ, ոչ թե դեմարշներ անել առանց պատճառի», - ասել է նա։
Նրա խոսքով՝ բարձր մակարդակի հանդիպումներն անցկացվում են հենց նրա համար, որ քննարկեն բոլոր սուր հարցերը և լուծումներ գտնեն։
«Իսկ կոնֆլիկտային իրավիճակ կարող են ստեղծել միայն մեկօրյա քաղաքական գործիչները` նվեր անելով նրանց, ովքեր շահագրգռված չեն ՀԱՊԿ անդամ պետությունների անվտանգության ամրապնդմամբ։ Դա անպատասխանատու և անհեռատես քայլ է», - նշել Է Լուկաշենկոն։
Բելառուսի առաջնորդը համոզված է, որ անկախ ամեն ինչից, ՀԱՊԿ–ն ի վիճակի է հաղթահարել բոլոր դժվարությունները իր պատասխանատվության գոտում։
«Եվ ենք դա անում ենք, թեկուզ ոչ ամբողջ ծավալով, բայց շատ բան ենք անում, հատկապես վերջին ժամանակաշրջանում»,– հավելել է նա։
Բելառուսի նախագահը հույս է հայտնել, որ հայ գործընկերները ներկա կլինեն առաջիկայում Սանկտ Պետերբուրգում կայանալիք միջոցառումներին։
Անդրադառնալով նիստի օրակարգին՝ Լուկաշենկոն նշել է, որ պետությունների ղեկավարները նեղ ձևաչափով քննարկել են գլոբալ անվտանգության խնդիրները: Քննարկվել են նաև ՀԱՊԿ պատասխանատվության գոտուն հարող տարածաշրջաններում ճգնաժամային իրավիճակների կարգավորմանը վերաբերող հարցեր:
«Հավաքական անվտանգության խորհրդի բոլոր անդամները նշեցին, որ ներկայիս միջազգային իրավիճակը բնութագրվում է առճակատման և բևեռացման բարձր աստիճանով, մենք պետք է համախմբենք ջանքերը, ամրապնդենք մեր կազմակերպությունը` որպես եվրասիական տարածաշրջանում անվտանգության ապահովման կարևոր գործոն», – ասել է Բելառուսի ղեկավարը:
Նա նաև հայտնել է, որ կազմակերպության կարգի համաձայն ՝ ՀԱՊԿ-ի նախագահությունը 2024 թվականի հունվարի 1-ից կանցնի Ղազախստանին։
Հիշեցնենք` Հավաքական անվտանգության խորհրդի նիստը կազմակերպվել է Մինսկում, ՀՀ վարչապետ Նիկոլ Փաշինյանը ներկա չէ հանդիպմանը։ Հայաստանի ներկայացուցիչները չեն մասնակցել նաև ՀԱՊԿ արտաքին գործերի նախարարների խորհրդի, պաշտպանության նախարարների խորհրդի և անվտանգության խորհրդի քարտուղարների կոմիտեի համատեղ նիստին։ Հանդիպմանը համաձայնեցվել է շուրջ 20 փաստաթուղթ։