ԵՐԵՎԱՆ, 21 նոյեմբերի – Sputnik. ՀՀ օրակարգում ՀԱՊԿ-ի հետ համագործակցությունից հրաժարվելու հարց չկա։ Այդ մասին խորհրդարանում ճեպազրույցի ժամանակ ասաց ՀՀ ԱԺ փոխնախագահ Հակոբ Արշակյանը։
Ավելի վաղ հայտնել էինք, որ Հայաստանը ՀԱՊԿ գործընկերներին խնդրել է օրակարգից հանել երկրին օգնություն տրամադրելու մասին փաստաթուղթը։
«Նման հարց չի քննարկվել։ Իսկ Հայաստանը հրաժարվել է ՀԱՊԿ օգնության փաթեթից, քանի որ ՀԱՊԿ-ը չի արձանագրում, թե որտեղ է սկսվում ու ավարտվում կազմակերպության պատասխանատվության տարածքը։ Ցավոք, այդ տարածքն ու ՀՀ կոնկրետ քարտեզն իր սահմաններով չի արձանագրվել, դա է խնդիը։ Եվ այս մասին ՀԱՊԿ-ի հետ աշխատանքներում բաց խոսվել է»,– ասաց նա։
Արշակյանը վստահեցրեց, որ այլ մանրամասների չի տիրապետում, թե այդ փաթեթում էլ ինչ է ներառված, մասնավորապես՝ արդյոք Հայաստան ՀԱՊԿ դիտորդական առաքելություն ուղարկելու մասին դրույթ կա՞ր, թե՞ ոչ։
Արդյոք ՀՀ իշխանություններն անվտանգային այլընտրանքային համակարգեր արդեն դիտարկում են, թե ոչ հարցին ԱԺ փոխխոսնակ պատասխանեց` ասելով, որ դրանք միայն պայմանագրեր չեն, դրանք սպառազինություն են, զինվորներ են։
«Տեսնում եք, որ առնվազն սպառազինությունների ձեռքբերման առումով արդեն պայմանագրեր կան, և ՀՀ–ն դրանք արդեն օգտագործում է»,– նշեց Արշակյանը։
Ըստ նրա` այսօր հայկական բանակն ունի սպառազինության տարբեր մատակարարներ, որոնք նախկինում չուներ։
Հիշեցնենք, որ նոյեմբերի 13–ին սոցցանցերում և Telegram ալիքներում հայտնվել են Վրաստանում գտնվող ֆրանսիական «Բաստիոն» զրահամեքենաների լուսանկարներ. նշվում էր, որ դրանք ուղևորվում են Հայաստան:
ՀՀ ՊՆ-ն չի մեկնաբանել ֆրանսիական զրահամեքենաների մատակարարման մասին լուրերը:
Հիշեցնենք նաև, որ Երևանն ու Բրյուսելը Եվրոպական միության առաքելության կարգավիճակի վերաբերյալ համաձայնագիր են ստորագրել։ Եվրամիության արտգործնախարարները հավանություն են տվել Հայաստանում տեղակայված ԵՄ դիտորդական առաքելությունն ընդլայնելու առաջարկին։