ԵՐԵՎԱՆ, 20 նոյեմբերի - Sputnik. Մեծ Բրիտանիան տրամադրված է Ռուսաստանի հետ առևտրատնտեսական համագործակցության վերջնական դադարեցման։ Այս մասին ՌԻԱ Նովոստիին տված հարցազրույցում հայտարարել է ՌԴ ԱԳՆ Երկրորդ Եվրոպական դեպարտամենտի տնօրեն Սերգեյ Բելյաևը։
Նրա խոսքով` այս փուլում ռուս-բրիտանական հարաբերություններն ապրում են ամենախորը ճգնաժամերից մեկը, և կարգավորման հնարավորության մասին խոսք չկա։
Դիվանագետը հավելել է, որ դրա մեղավորը երկար տարիներ պահպանողականների կառավարության կողմից իրականացվող հետևողական քաղաքականությունն է` դժվար շտկելի վնաս հասցնելուն ուղղված, որը քայքայում է երկկողմ համագործակցության կտավը:
«Բավական է հիշատակել «Ալեքսանդր Լիտվինենկոյի գործի» շուրջ բրիտանական զրպարտությունները և Սկրիպալներին «թունավորելու» հետ կապված սադրանքը։ Բացի այդ, Լոնդոնը վաղուց անվտանգ ապաստան է դարձել այնպիսի ահաբեկիչների համար, ինչպիսին Ահմեդ Զաքաևն է, և հարթակ, որտեղ բացահայտ դիվերսիոն գործունեություն են ծավալում ռուսատյացները Միխայիլ Խոդորկովսկու գլխավորությամբ (ՌԴ-ում ճանաչվել է օտարերկրյա գործակալ խմբ.)»,-հավելել է նա։
Բելյաևի խոսքով` Մեծ Բրիտանիայի իշխանությունները շարունակում են Կիևի նեոնացիստական ռեժիմին համակողմանի աջակցության կուրսը. իրականացվում են սեփական ռազմարդյունաբերական համալիրի արտադրանքի մատակարարումներ, Բրիտանական կղզիների տարածքում ուկրաինացի զինվորականների նախապատրաստում»:
«Այս պայմաններում ռուս-բրիտանական հարաբերություններում որևէ կարգավորման հնարավորության մասին խոսել չի կարելի։ Ակնհայտ է, որ Լոնդոնը մտադիր է այսուհետ ևս պահպանել առճակատման վարքագծի մոդելը երկկողմ հարաբերություններում», - ասել է նա։
Նա նշել է` այդ մասին է վկայում այն փաստը, որ Մեծ Բրիտանիայի կառավարության կողմից 2023 թվականի մարտին հրապարակված նորացված համապարփակ արտաքին քաղաքական վերլուծության մեջ Ռուսաստանը շարունակում է բնութագրվել որպես Մեծ Բրիտանիայի անվտանգության համար առավել սուր սպառնալիք: