ԵՐԵՎԱՆ, 19 նոյեմբերի — Sputnik. ԱՄՆ-ն հուսալիորեն «կփակի» Իսրայելին, եթե պահանջվի ստուգել այդ երկրում միջուկային զենքի առկայությունը։ Իսրայելի զենքի մասին Անկարայի հայտարարություններն ավելի հեռու չեն գնա, քան բուն հայտարարությունները, ՌԻԱ Նովոստիի հետ զրույցում հայտարարել է Բարձրագույն տնտեսագիտական դպրոցի համաշխարհային տնտեսության և համաշխարհային քաղաքականության ֆակուլտետի արտասահմանյան տարածաշրջանագիտության բաժնի պրոֆեսոր Անդրեյ Բակլանովը:
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ միջազգային հանրությունը պետք է ստուգի Իսրայելին միջուկային զենքի առկայության համար, իսկ Թուրքիայի արտգործնախարար Հաքան Ֆիդանը նշել էր, որ Թել Ավիվի միջուկային զենք ունենալը ռազմավարական խնդիր է, որը պետք է լուծել:
«Իսրայելի միջուկային զենքի առկայությունը նոր խնդիր չէ, և հարցը բազմիցս քննարկվել է, բայց ամեն անգամ քննարկումները մարվել են այն պատճառով, որ ԱՄՆ-ն չի նպաստել այդ քննարկումն ավարտին հասցնելուն։ Անվտանգության խորհրդում ուժերի հարաբերակցությունը այնպիսին էր, որ Իսրայելի շահերը հուսալիորեն պաշտպանվում էին ԱՄՆ-ի կողմից», - պարզաբանել է Բալկանովը։
Փորձագետի խոսքով՝ Թուրքիային դա շատ լավ հայտնի է, և այնտեղ հասկանում են, որ իրական տեսչությունն առաջ տանելը չափազանց դժվար կլինի։ Նա ավելացրել է, որ հավանաբար, Անկարային դա պետք էլ չէ։
«Թուրքիան աշխատում է իսլամական երկրների շարքում առանձնահատուկ, առաջատար դիրք գրավելու ուղղությամբ՝ հետ մղելով Եգիպտոսին, Պակիստանին և Սաուդյան Արաբիային։ Այսպիսով, նրանք օգտագործում են հատկապես ռեզոնանսային թեմաները: Բայց հռետորաբանությունից այն կողմ, վստահ եմ, գործը չի գնա», - եզրափակել է Բակլանովը։
Հիշեցնենք, որ Իսրայելի՝ Երուսաղեմի և ժառանգության հարցերով նախարար Ամիհայ Էլիյահուն ավելի վաղ Գազայի վրա ատոմային ռումբի նետումը անվանել էր հակամարտության զարգացման «հնարավորություններից մեկը»: