ԵՐԵՎԱՆ, 17 նոյեմբերի – Sputnik. Ուելսի հետ խաղում Հայաստանի հավաքականը ֆավորիտ չէ։ Այս մասին այսօր նախախաղյան մամուլի ասուլի ժամանակ հայտարարեց Հայաստանի ֆուտբոլի ազգային հավաքականի գլխավոր մարզիչ Ալեքսանդր Պետրակովը։
«Այս խաղը բացարձակ այլ կլինի առաջինի հետ համեմատ (առաջին խաղում Հայաստանի հավաքականը հաղթել է Ուելսի հավաքականին 4։2 հաշվով – խմբ.)։ Մեզ «բաց» խաղ չի սպասվում: Երկու թիմի նպատակն էլ վաղվա խաղում հաղթելն է»,– ասաց մարզիչը։
Պետրակովն նշեց, որ վաղը ակնկալում է ինքնանվիրված խաղ ու դրական արդյունք:
«Այս խաղով ֆուտբոլիստները հնարավորություն ունեն մտնելու պատմության մեջ»,-ասաց Պետրակովը։
Հայաստանի ազգային հավաքականի նորեկ Էդգար Սևիկյանն էլ լրագրողների հետ զրույցում ասաց, որ Ուելսի հավաքականը ծանր մրցակից է, բայց հավելեց, որ մարտական է տրամադրված։
«Չեմ ստի` առաջին տնային խաղից առաջ հուզմունք կա: Սակայն ամբողջ թիմը տրամադրված է հաղթական խաղի: Մեր առաջիկա երկու խաղերը երկու եզրափակիչներ են մեզ համար: Պայքարելու ենք մինչև վերջին պահը: Մենք շանս ունենք հաղթահարելու խմբային փուլի արգելքը և անելու ենք ամեն ինչ` դրական արդյունքի հասնելու համար»,-ասաց նա:
Հիշեցնենք, որ ֆուտբոլի Եվրոպայի առաջնության ընտրական փուլի նախավերջին տուրում Հայաստանի հավաքականը վաղը Երևանում կհանդիպի Ուելսի հավաքականի հետ։ Հանդիպումը կմեկնարկի Երևանի ժամանակով 18:00-ին:
Նշենք, որ այս պահին մրցաշարային աղյուսակում Հայաստանը 7 միավորով զբաղեցնում է 4–րդ հորիզոնականը։ Առաջին տեղում է Թուրքիան, երկրորդում` Խորվաթիան, երրորդ տեղում Ուելսի հավաքականն է։ Մեզ զիջում է միայն Լիտվայի հավաքականը։