ԵՐԵՎԱՆ, 17 նոյեմբերի – Sputnik. Մրցակցության պաշտպանության հանձնաժողովը վստահեցնում է` Հայաստանում բենզինի գործող գներն արտահայտում են օբյեկտիվ իրականությունը։ Տեղեկությունը հայտնում է ՄՊՀ մամուլի ծառայությունը։
«Հանձնաժողովի իրականացրած ուսումնասիրության արդյունքում պարզվել է, որ միջազգային բորսաներում արձանագրվել է բենզինի գների բարձրացում: Հաշվի առնելով ՀՀ տնտեսավարողների լոգիստիկ ծախսերը և հարկերը՝ ՀՀ-ում բենզինի գործող գներն արտահայտում են օբյեկտիվ իրականությունը»,– ասված է հաղորդագրությունում:
Նշվում է, որ հանձնաժողովը հետևում է, որպեսզի բենզինի շուկայում գների չհիմնավորված տատանումներ տեղի չունենան։
Այն, որ ԵԱՏՄ անդամ այլ երկրների համեմատ Հայաստանում բենզինի իրացման գներն ավելի բարձր են, ապա պետք է հաշվի առնել, որ այնտեղ (երկրներն ունեն բենզինի սեփական պաշարներ), կիրառվում են ներքին շուկայի սուբսիդավորման մեխանիզմներ։
Միաժամանակ հանձնաժողովը մշտական կապի մեջ է տնտեսավարողների հետ՝ նրանցից ստանալով օպերատիվ տեղեկություն: Հարկ է նշել, որ գների բարձրացմանը զուգահեռ տնտեսավարողները նվազեցրել են իրենց շահույթը՝ նպատակ ունենալով ստեղծված պայմաններում հնարավորինս մեղմել գների ավելացումը:
Հիշեցնենք, որ օրեր առաջ ԱԺ–ում «Հայաստան» խմբակցության պատգամավոր Գառնիկ Դանիելյանը հայտնել էր, որ բենզինի պրեմիում տեսակի 1 լիտրը հատել է 570 դրամի սահմանը։ Նա ընդգծել էր նաև, որ հեղուկ գազի արժեքն էլ 160 դրամից դարձել է 220 դրամ։